Cha bhi casg tuilleadh air stòbhaichean fiodha an taighean ùra

Dhearbh Riaghaltas na h-Alba gu bheil iad a' cur às gu tur do chasg air stòbhaichean a tha a' losgadh fiodha no mòine ann an taighean agus togalaichean ùra.

Chuir ministearan Nàiseantach casg an gnìomh sa Ghiblean - fhad 's a bha iad fhathast ann an co-bhanntachd riaghlaidh le Uainich na h-Alba - air siostaman teasachaidh às an tig eimiseanan, goileadairean gas is ola nam measg, ann an dachaighean agus togalaichean ùra.

Chaidh sin a thogail rè ùine san t-Sultain leis gun robh dragh ann mun bhuaidh air sgìrean dùthchail.

Tha an Riaghaltas air na riaghailtean atharrachadh agus bidh cead aig daoine fiodha no mòine a losgadh ann an stòbhaichean agus siostaman teasachaidh eile.

Tha casg fhathast air ola agus gas mains mar phrìomh chonnadh.

Bha an Riaghaltas airson toirt air luchd-togail siostaman teasachaidh nas glaine a chur an sàs airson truailleadh adhair a lùghdachadh agus dèiligeadh ri atharrachadh na h-aimsire.

Thuirt Ministear Atharrachadh na Gnàth-Shìde, Alasdair Allan, gun do dh'èist an Riaghaltas ri na draghan a nochd daoine "mu sheasmachd an dealain nuair a tha droch shìde ann".

Thuirt Mgr Allan: "Tha na h-atharrachaidhean seo ag aithneachadh nan draghan seo ach a' cumail ri amas an reachdais aig a' cheart àm airson goileadairean gas is ola a chasg bho thaighean agus togalaichean ùra."

Thuirt am ministear gu bheil na riaghailtean ùra air leth cudromach ann an bhith a' lùghdachadh na tha de dh'eimiseanan a thig à togalaichean ùra, agus gun "dèan e cinnteach gum biodh Alba nas uaine agus nas glaine san àm ri teachd".