Dòchas gun cuir slighean ùra ri fàs rothaireachd beinne an Inbhir Nis

Dh'fhosgail slighean ùra rothaireachd beinne aig Acadamaidh Rìoghail Inbhir Nis Disathairne is dòchas ann gum brosnaich iad daoine 'son a dhol an sàs sa spòrs.

Tha trì slighean fa leth ann air làraich ri taobh phàircean spòrs na sgoile.

Tha an sgoil air oidhirp mhòr a dhèanamh a thaobh rothaireachd anns na bliadhnaichean mu dheireadh.

Chaidh hub sònraichte a stèidheachadh ann an 2018 leis an amas rothaireachd a bhrosnachadh am measg sgoilearan is an teaghlaichean agus sa choimhearsnachd ionadail san fharsaingeachd.

Bhon uairsin tha iad air àrdachadh susbainteach fhaicinn anns na th' ann de sgoilearan a tha a' tighinn dhan sgoil air baidhseagal.

'S i tè de thidsearan PE na sgoile, Jane Shiosalach, a tha air a bhith gu mòr an sàs anns na leasachaidhean is i air a bhith ag obair fad grunn bhliadhnaichean gus na slighean ùra a chur air air dòigh.

Fhuaireadh £40,000 roimhe bho Riaghaltas na h-Alba is taic cuideachd air tighinn bho Chomhairle na Gàidhealtachd.

Leis an airgead ann an àite, 's e Ronan Taylor bhon chompanaidh Raylors Trail Design san Eilean Dubh a rinn an obair fhèin air na slighean anns na mìosan mu dheireadh.

"Rinn Jane gu sònraichte obair mhòr, mhòr gus am pròiseact seo a thoirt gu buil," thuirt Ronan.

"Thòisich sinn an obair-togail fhèin as t-fhoghar is tha sinn air ar dòigh".

'S e am plana gun tèid na slighean ùra a chleachdadh le sgoilearan tron là is gum bi cothrom aig coidsichean is muinntir na coimhearsnachd orra air an oidhche is aig an deireadh-sheachdain.

"Bhithinn air a bhith air mo dhòigh nam biodh rudeigin mar seo agam nuair a bha mi san sgoil," tha Ronan ag ràdh.

"Bidh e ann dhan sgoil ach cuideachd dhan choimhearsnachd agus 's e toiseach-tòiseachaidh math a thaobh rothaireachd beinne.

"Chan eil feum air baic spaideil is faodaidh daoine aig ìre sam bith fheuchainn.

"Tha e sa bhaile ach tha sinn an dòchas gum faigh daoine blas air a shon is gun tèid iad a-mach dha na cnuic," thuirt e.