Urras Fearann Chlann Dòmhnaill gus am fearann aca a reic

Dh'innis Urras Fearann Chlann Dòmhnaill gun do rinn iad "an co-dhùnadh duilich" gun tèid an talamh agus na togalaichean aca san Eilean Sgitheanach air a' mhargaidh a dh'aithghearr.

Am measg na tha fo shealbh aca tha Caisteal Armadail ann an Slèite, a tha iad am beachd a reic fa leth.

An-diugh tha e na thobhta ach aig aon àm b' e prìomh àite-còmhnaidh Chlann Dòmhnaill Shlèite.

Ann am brath sgrìobhte air an làraich-lìn aca mhìnich an t-urras gur e as coireach na cosgaisean a tha a' sìor èirigh an luib Caisteil Armadail, a bha a-riamh, thuirt iad, an eisimeil thabhartasan on taobh a-muigh.

Tha e na amas aig an Urras a-nis a bhith a' gluasad gu bhith mar bhuidheann a bhios a' cumail taic ri dualchas agus ealain na Gàidhealtachd.

B' e prìomh àite-còmhnaidh Chlann Dòmhnaill Shlèite a bh' ann an Caisteal Armadail

Chaidh taigh-mòr a thogail air an làraich le sealladh air An Linne Shlèitich mu 1790 agus chaidh a chur ris agus a dhèanamh na chaisteal ann an 1815.

Tha grunn dhaoine ainmeil co-cheangailte ri Caisteal Armadail.

Ann an 1750 's ann ann a phòs Flòraidh Dhòmhnallach a thug taic do Theàrlach Òg Stiùbhart teicheadh an dèidh call nan Seumasach aig Blàr Chùil Lodair.

Thadhail Samuel Johnson agus Seumas Boswell ann ann an 1773 mar phàirt den turas mhòr aca tro na h-Eileanan an Iar.

Chaidh an caisteal a dhìth an dèidh mar a ghluais an ceann-feadhna agus a theaghlach gu taigh nas lugha

Ann an 1925 chuir an ceann-feadhna agus a theaghlach an cùl ris a' chaisteal agus ghluais iad gu taigh nas lugha.

Chaidh an seann dachaigh aca a sgrios thar nam bliadhnaichean leis a' ghaoith 's an uisge.

Chaidh na bh' air fhàgail dheth agus na gàrraidhean sa bheil 40 acair a chur air a' mhargaidh ann an 1972 agus a cheannach le Urras Fearann Chlann Dòmhnaill.

Dhearbh an t-Urras gun tòisich a' mhargaidheachd airson na talmhainn agus a' chuid as motha de na togalaichean aca air an 27mh den Mhàrt.

Thèid Caisteal Armadail a chur air a' mhargaidh leis fhèin às dèidh sin.

Thuirt na h-urrasairean gun robh dleasdanas laghail orra mar bhuidheann charthannais an so-mhaoin aca a làimhseachadh air dhòigh agus gun tèid na h-amasan carthannach aca a choileanadh.

Thuirt iad: "Feumaidh sinn na tha fo shealbh againn a reic ri ceannaiche a tha ann an suidheachadh ionmhais làidir.

"Tha sinn den bheachd gum faigh Slèite buannachd às a' bheartas agus in-ionmhas a bheireadh leithid de cheannaiche dhan sgìre."

Thuirt iad gun tèid an carthannas na bhuidhinn a bheir seachad ghrantaichean airson phròiseactan dualchais agus ealain.