Oifigearan sònraichte a' coimhead airson deugaire a tha a dhìth

Tha oifigearan sònraichte à Obar Dheathain agus Inbhir Nis a' cuideachadh leis an iomairt gus lorg fhaighinn air deugaire a chaidh a dhìth ann an Leòdhas bho chionn ceithir là.

Chunnacas Aleksandr Benga, 16, mu dheireadh sa Ghearradh Chruaidh madainn Diluain mu 08:45m.

Chaidh iarraidh air daoine timcheall air Steòrnabhagh sùil a thoirt air seadaichean agus togalaichean eile, feuch a bheil e a’ gabhail fasgaidh annta.

Dh'iarr na poilis air a' mhòr-shluagh cuideachd coimhead ri CCTV ma tha sin aca feuch an do thog an siostam aca dealbhan de Aleksandr.

Chaidh a ràdh gu bheil an deugaire 6tr. is 2òir. a dh'àirde agus gu bheil e caol le falt goirid donn.

Nuair a chaidh Aleksandr fhaicinn mu dheireadh bha geansaidh bèis air, dìnichean dubha, agus dh'fhaodadh gu bheil seacaid dhearg aige.

Thuirt na poilis gu bheil beachd nas fheàrr aca a-nis càite an robh Aleksandr mus deach e dhan Ghearradh Chruaidh an dèidh dhaibh coimhead ri deilbh CCTV agus bhideothan bhon mhòr-shluagh, ach nach eil fhios aca fhathast càite an deach e às dèidh sin.

Tha na poilis fìor dhraghail mu shàbhailteachd a' bhalaich, agus dh'iarr iad air Aleksandr fhèin fios a thuca ma chì e an tagradh aca.

Bu chòir duine sam bith le fiosrachadh brath a chur gu Poileas Alba air 101.