Dachaigh-cùraim Gheàrrloch gus fosgladh às ùr

Dhearbh NHS na Gàidhealtachd gun tèid dachaigh-cùraim Strathburn House ann an Geàrrloch fhosgladh às ùr anns na beagan mhìosan air thoiseach.

Chaidh an dachaigh a dhùnadh rè ùine san Iuchar an-uiridh ri linn dìth luchd-obrach, agus dragh ann mu shàbhailteachd luchd-còmhnaidh air sgàth sin.

Chaidh àiteachan-còmhnaidh eile a lorg dhan fheadhainn a bha a' fuireach ann aig an àm.

Dh'innis am Bòrd Slàinte Diardaoin gu bheil iad air gu leòr luchd-obrach ùra fhastadh airson fosgladh a-rithist.

Air thoiseach air a bhith a' toirt luchd-còmhnaidh air ais dhan dachaigh-chùraim, tha cuireadh ga thoirt do bhuill den choimhearsnachd tighinn a-steach a choimhead air an àite air an 9mh là den Ghiblean.

Thuirt manaidsear na dachaigh-cùraim, Caoimhin MacÌomhair, gun deach obair mhòr a dhèanamh gus an ìre seo a ruighinn, agus gu bheil iad a' coimhead air adhart ri bhith a' coinneachadh ri daoine aig an là fosgailte.