Dùil ri FAI air bàs thriùir shreapadairean an Gleann Comhann

Nochd dragh mun triùir shreapadairean nuair nach do thill iad bho là air an Aonach Eagach

Tha dùil gun tòisich Rannsachadh Tubaist Bhàsmhor (FAI) as t-samhradh seo air mar a bhàsaich triùir luchd-sreap ann an Gleann Comhann.

Chaill Graham Cox, 60, Hazel Crombie, 64, agus Dàibhidh Fowler, 39, am beatha 's iad a' sreap air an Aonach Eagach san t-Sultain 2023.

Tha an druim a tha sia mìle (9.7km) de dh'fhaid agus cho àrd ri 3,608 troigh (1,100m) air fear dhen fheadhainn as cumhaing air tìr-mòr Bhreatainn.

Tha e a' tarraing mòran shreapadairean.

Aig èisteachd dh'innis an Siorram Neil Wilson gun robh dùil aige gun tèid an rannsachadh a chumail air an 18mh agus an 19mh den Lùnastal aig Cùirt an t-Siorraidh sa Ghearastan.

Thèid èisteachd ro-ìreach a chumail air an 9mh den Ògmhios.

B' adhbhar dragh a bh' ann nuair nach do thill an triùir shreapadairean bho chuairt-bheinne Disathairne an 5mh den Lùnastal.

Chaidh heileacoptair nam maor-cladaich ann an Inbhir Nis chun na làraich ged a bha ceò ann, mus deach na cuirp a lorg an ath-là.

Thug sgiobannan teasairginn nam beann aig an RAF agus à Gleann Comhann taic dhan iomairt.