Leas-mhorairean-ionaid a' Chrùin ùra sna h-Eileanan an Iar

Bidh Christine Nic a' Bhreatnaich (clì) agus Magaidh NicAoidh a' cumail taic ri Morair-ionaid a' Chrùin, Iain MacAmhlaigh

Dh'ainmich Morair-ionaid a' Chrùin do na h-Eileanan an Iar, Iain MacAmhlaigh, gur iad Christine Nic a' Bhreatnaich à Barraigh agus Magaidh A NicAoidh à Nis a thèid nan Leas-mhorairean-ionaid a' Chrùin sa sgìre.

Thèid a' Bhean-phòsta Nic a' Bhreatnaich an àite Ealasaid McTear san Dàmhair. Tha ise air a bhith na Iar-mhorair-ionaid a' Chrùin bho 2017, agus ron sin bha i na Leas-mhorair-ionaid a' Chrùin bho 1998.

Gabhaidh Miss NicAoidh os làimh uallach Annie NicSuain MBE ann an ceann a tuath Leòdhais agus dùil gun leig ise dhith a dreuchd san t-Samhain. Tha a' Bhean-phòsta NicSuain air a bhith na Leas-mhorair-ionaid a' Chrùin bho 2011.

Tha Christine Nic a' Bhreatnaich aithnichte am Barraigh agus am Bhatarsaigh airson na tha i a' dèanamh às leth na coimhearsnachd. Bha i na nurs ann an Glaschu mus do thill i a Bharraigh far an do phòs i agus far an do thog i teaghlach.

Tha i air a bhith ag obair ann am bùth A&C MacLean's ann am Bàgh a' Chaisteil airson 40 bliadhna agus tha i gu mòr an sàs ann an obair Eaglais Naoimh Bharr sa Bhàgh a Tuath.

Thuirt Christine: "'S e urram mòr dhomh an obair seo fhaighinn agus tha mi a' dèanamh fiughair ri bhith a' cumail taic ri Morair-ionaid a' Chrùin na dhreuchd ann am Barraigh agus Bhatarsaigh agus air feadh nan Eilean Siar."

'Urram mòr'

Tha Magaidh NicAoidh air a bhith na clàrc do Mhorair-ionaid a' Chrùin bho 2016 agus leanaidh i san obair sin nuair a thèid i na Leas-mhorair-ionaid a' Chrùin. 'S e neach-lagha a th' innte agus na stiùiriche aig a' chompanaidh Anderson MacArthur ann an Steòrnabhagh.

Tha i cuideachd na ball de Bhòrd Ùghdarras a' Chlò Hearaich agus gu mòr an sàs ann an tachartasan coimhearsnachd ann an Nis, nam measg Club Sòisealta Sgioba ball-coise Nis agus Là Gàla Nis.

Thuirt Magaidh: "'S e urram a th' ann dhomh gun deach mo thaghadh mar Leas-mhorair-ionaid a' Chrùin agus gun urrainn dhomh a bhith a' cuideachadh leis an obair a bhios Morair-ionaid a' Chrùin a' dèanamh sna h-Eileanan an Iar."

'S e Morair-ionaid a' Chrùin riochdaire an Rìgh ann an sgìre. Sna h-Eileanan an Iar, tha Iain MacAmhlaigh a' faighinn taic bho Iar-mhorair-ionaid agus suas ri naoinear a tha nan Leas-mhorairean-ionaid a' Chrùin cho math ri Clàrc.

Gheibhear tuilleadh fiosrachaidh mun obair aca an seo.