Urraman a' dol dhan Ghàidhealtachd agus na h-Eileanan

Tha Bill Lawson am measg na tha a' faighinn aithne ann an Liosta Urraman na Bliadhna Ùire

Tha Betty Nic an t-Saoir à Barraigh is Bill Lawson às na Hearadh am measg dhaoine às a' Ghàidhealtachd is na h-Eileanan a tha air aithne fhaighinn ann an Liosta Urraman na Bliadhna Ùire.

Tha Teàrlach MacNeacail à Leòdhas is an lùth-chleasaiche Fin Greumach à Srath Pheofhair am measg feadhainn eile aig tuath a tha air urraman fhaighinn.

Fhuair Betty Nic an t-Saoir OBE airson seirbheisean dha na h-Eileanan an Iar.

Bha a' Bh-Ph. Nic an t-Saoir 26 bliadhna na Riochdaire a' Chrùin sna h-Eileanan an Iar mus do leig i dhith a dreuchd am-bliadhna, an toiseach na Leas-Mhorair-Ionaid a' Chrùin is an uairsin na h-Iar-Mhorair-Ionaid a' Chrùin.

Tha i cuideachd air a bhith an sàs ann an grunn dreuchdan eile thar nam bliadhnaichean, nam measg a bhith na manaidsear air Biùro Comhairleachaidh a' Phobaill ann am Barraigh, na comhairliche, na cathraiche air bòrd Colaiste a' Chaisteil, agus ùine air Bòrd na Gàidhlig (far an robh i cuideachd na cathraiche eadar-amail) is Bòrd Slàinte nan Eilean Siar.

Thuirt i gu bheil e doirbh dhi creidsinn gun d'fhuair i OBE is gur e urram fìor mhòr a th' ann.

Fhuair an lùth-chleasaiche Fin Greumach MBE 'son seirbheisean do rothaireachd.

Shoirbhich le Fin aig na Geamaichean Paralimpigeach ann am Paris as t-Samhradh is e a' cosnadh dà bhonn.

Bhuannaich e bonn òir ann an Rèis Rathaid C1 - 3 is bonn airgid ann am farpais C3 3000m Individual Pursuit nam fear.

Bha an Greumach cuideachd air clàr na cruinne a bhristeadh san fharpais sin - ged a chaidh a bhristeadh a-rithist cha mhòr sa bhad le Jaco van Gass.

Chaidh fàilte mhòr air Fin Greumach nuair a thill e dhachaigh dhan Ghàidhealtachd bho na Geamaichean Paralimpigeach ann am Paris

Tha Bill Lawson air BEM fhaighinn airson seirbheisean dhan choimhearsnachd anns na h-Eileanan an Iar.

Rugadh Mgr Lawson ann an Sruighlea is thogadh e ann an Siorrachd Àir.

Às dèidh mòran bhliadhnaichean a' teagaisg lagh ann am Pàislig ghluais e dha na h-Eileanan an Iar agus rinn e a dhachaigh anns na Hearadh.

Às an rannsachadh aige air eachdraidh nan daoine, stèidhich e Cò Leis Thu? is e fhèin 's a bhean Chrissie nach maireann iomadh bliadhna a' cuideachadh dhaoine le fiosrachadh mun sinnsireachd.

Tha Cò Leis Thu? a-nise fo sgèith Urras Dualchais an Taobh Tuath aig Ionad Hebrides People.

Tha Mgr Lawson na chomhairliche dhan urras is e cuideachd a' leantainn leis an rannsachadh aige fhèin.

Tha BEM cuideachd a' dol gu Teàrlach MacNeacail à Steòrnabhagh airson Seirbheis Shaor-Thoileach is Charthannach anns na h-Eileanan an Iar.

Bha Mgr MacNeacail na chomhairliche fad 14 bliadhna is e cuideachd an sàs ann an grunn bhuidhnean coimhearsnachd is òigridh.

Tha e cuideachd air obair mhòr a dhèanamh gus taic a chumail ri muinntir Mholdòbha le aodach is stuthan eile a chur ann.

A thuilleadh air seo, chaidh Bonn an Rìgh airson na Seirbheis Smàlaidh gu Karla Stevenson, a bha roimhe os cionn na seirbheis san Eilean Sgitheanach is Ratharsair.

Teàrlach MacNeacail