Nochdaidh Supergrass agus Natasha Bedingfield aig Bella

Bidh Supergrass, Tom Walker agus Natasha Bedingfield am measg na bhios a' nochdadh air an àrd-ùrlar aig Fèis Bhelladrum as t-samhradh.

Dh'innis luchd na fèise mu thràth gum bi an còmhlan Texas ann cho math ri Paul Heaton bho The Beautiful South a bhios a' seinn còmhla ris an t-seinneadair à Glaschu, Rianne Downey.

Tha Supergrass a' comharrachadh am-bliadhna gu bheil 30 bliadhna ann on thàinig a' chiad chlàr aca, I Should Coco, a-mach.

Tha Tom Walker air Duais Brit fhaighinn, agus dh'fhoillsich Natasha Bedingfield a' chiad chlàr aice, Unwritten, ann an 2004.

'S e Belladrum, a bhios air a chumail faisg air a' Mhanachainn, an tachartas ciùil as motha air a' Ghàidhealtachd le mu 25,000 ga fhrithealadh thairis air trì là.

Thèid an fhèis a chumail am-bliadhna eadar an 31mh den Iuchar agus an 2na den Lùnastal.