Fo-thaghaidhean Comhairle na Gàidhealtachd a' teannadh dlùth

Tha Comhairle na Gàidhealtachd a' cur an cuimhne dhaoine mar a nì iad cinnteach gu bheil bhòt aca airson nam fo-thaghaidhean a bhios ann air an ath-mhìos.

Feumaidh daoine iad fhèin a chlàradh airson cothrom riochdaire a thaghadh airson na sgìre aca.

Bidh fo-thaghaidhean airson dà uàrd ann Diaordaoin an 19mh den Ògmhios - Linne Chromba agus Eilean a' Cheò.

Faodaidh daoine nas sine na 16 bliadhna de dh'aois bhòtadh cho fad 's a tha iad clàraichte.

Feumar sin a dhèanamh ro meadhan-oidhche Dimàirt 3 den Ògmhios.

Faodar clàradh, bhòt-phuist neo cead gum bhòt cuideigin às do leth iarraidh an seo, agus faodar fònadh gu Oifis Clàraidh an Taghaidh air 0800 393783 ma tha sibh ag iarraidh bileag-bhòtaidh pàipeir.

Feumar cur a-steach airson bhòt-phuist ro 5:00f Diciadain an 4mh den Ògmhios, agus tha gu 5:00f Diciadain an 11mh den Ògmhios aig daoine neach ainmeachadh a nì bhòt air an son.

Chan fheum daoine dealbh dhiubh fhèin airson bhòtadh sna fo-thaghaidhean seo mar a dh'fheumas iad ann an taghaidhean Phàrlamaidean na Rìoghachd Aonaichte.

Thathar a' cur an cuimhne luchd-bhòtaidh gur e siostam bhòt shingilte ghluasadach a bhios ga chleachdadh.

Tha naoinear a' seasamh ann am fo-thaghadh Eilean a' Cheò

Tha aon chomhairliche ùr ga lorg airson Uàrd Eilean a' Cheò an dèidh do Chalum Rothach seasamh sìos.

Tha naoinear thaghraichean ann:

• John Coupland - Reform UK

• Campbell Dickson - Neo-eisimeileach

• Cairistìona NicIlliosa - Neo-eisimeileach

• Katy Lawrence - Uainich na h-Alba

• Màrtainn Mac a' Bhàillidh - Pàrtaidh Nàiseanta na h-Alba

• Jonathan Dòmhnallach - Neo-eisimeileach

• Seòras Mac a' Phearsain - Tòraidhean na h-Alba

• Fay NicThòmais - Libearalaich Dheamocratach na h-Alba

Tha ochdnar a' seasamh ann an Uàrd Linne Chromba an dèidh do Mhaxine Nic a' Ghobhainn falbh:

• Steve Siosalach - Pàrtaidh Alba

• Ross Costigane - Libearalaich Dheamocratach na h-Alba

• Richard James Cross - Neo-eisimeileach

• Ryan Foirbeis - Tòraidhean na h-Alba

• Ailean Dòmhnallach - Reform UK

• Odette Dhòmhnallach - Pàrtaidh Nàiseanta na h-Alba

• Michael Robert Perera - Pàrtaidh Nàiseanta na h-Alba

• Martin Rattray - Neo-eisimeileach

Gheibhear fiosrachadh mu na fo-thaghaidhean air làrach-lìn Comhairle na Gàidhealtachd an seo.