Fear-turais Albannach air bàsachadh às dèidh spreadhadh san Ròimh

Chaochail fear-turais Albannach às dèidh dha bhith air a dhroch ghoirteachadh ann an spreadhadh gas san taigh-aoigheachd anns an robh e a' fuireach san Ròimh.

Bha Grant Paterson, à Cille Bhrìghde an Ear, air turas sa bhaile nuair a chaidh an t-àite leabaidh is bracaist aige a sgrios gu tur air an 23mh den Mhàrt.

Chaidh Mgr Paterson a dhroch losgadh anns an spreadhadh san taigh-aoigheachd ann an sgìre Monteverde dhen bhaile.

Shlaod luchd-smàlaidh e a-mach à spruilleach an togalaich agus chaidh a thoirt dhan ospadal.

Thàinig dearbhadh Dimàirt gun robh e air bàsachadh.

Bha Mgr Paterson air obrachadh do ChalMac airson 12 bliadhna.

Thuirt Diane Burke, Àrd-oifigear Obrachaidh ChalMac, gun robh iad uile troimhe-chèile mu bhàs Grant.

"'S e duine uasail a bh' ann agus bha e na chreideas don MV Clansman, an t-aiseag air an robh e ag obair.

"'S e caractar mòr a bh' ann, agus bha meas mòr aig a cho-obraichean agus luchd-siubhail air.

"Tha ar smuaintean le teaghlach Grant agus a charaidean aig an àm fìor dhuilich a tha seo," thuirt i.

"Adhbhar bròin"

Ann am brath-sgrìobhte thuirt Mèar na Ròimh, Roberto Gualtieri, gun robh an naidheachd "na adhbhar bròin don Ròimh air fad".

"Tha mi airson cur an cèil na co-fhaireachdainnean agam fhèin agus a' bhaile air fad don luchd-dàimh aige. Tha mi an dòchas gum bi an rannsachadh mun chùis seo luath agus gun toir e soilleireachadh air an tubaist uabhasach seo," thuirt e.

Bha Mèar Gualtieri mar-tha air rannsachadh iarraidh air an spreadhadh.

Chuir caraid do Mhgr Paterson làrach air dòigh airson airgead a thogail dha fhèin is dhan nighinn aige agus tha còrr is £12,000 an dèidh bhith air a thrusadh.

Thuirt neach-labhairt do dh'Oifis nan Dùthchannan Cèin: "Tha sinn a' toirt taic do theaghlach fear Breatannach a bhàsaich san Eadailt agus tha sinn a' cumail fios ri na h-ùghdarrasan ionadail."