Clach-mhìle san leasachadh aig Ionad Thursachan Chalanais

Crann-togail aig ionad-tadhail Thursachan Chalanais a tha ga leasachadh Tùs an deilbh, URRAS NAN TURSACHAN
  • Air fhoillseachadh

Tha an obair air Ionad-tadhail ùr aig Tursachan Chalanais ann an Leòdhas air ceum air adhart a ghabhail agus a' chiad luchd de stàilinn air a shon air an làrach a ruighinn.

Cosgaidh am pròiseact còrr is £10m.

Thèid cur ris an togalach a bh' ann airson an goireas ùr a chruthachadh.

Thuirt Coinneach MacIllinnein, ball de dh'Urras nan Tursachan: "Chan e dìreach ionad-tadhail a th' anns a' phròiseact-sa; tha sinn a' cruthachadh àite dhan tèid an dà chuid luchd-turais agus luchd-còmhnaidh ionadail fad na bliadhna."

Thuirt Mark Davies, Manaidsear a' phròiseict: "Tha sinn air air dòigh gu bheil structar an ionaid ùir a' sìor fhàs follaiseach, leis gun toir seo sealladh dhan choimhearsnachd agus luchd-tadhail air cò ris a bhios e coltach."

Bidh obraichean ùra an cois a' phròiseict; tha Urras nan Tursachan an-dràsta a' fastadh airson grunn dreuchdan, nam measg Manaidsear Coitcheann, Manaidsear Dualchais agus Oifigear Didseatach.

Crann-togail aig làrach ionad-tadhail Thursachan Chalanais a tha ga leasachadhTùs an deilbh, URRAS NAN TURSACHAN

Cha do chosg e càil gu ruige seo a dhol a-steach do làrach nan tursachan fhèin ach tha deasbad air a bhith ann mu mholadh iarraidh air daoine pàigheadh airson na tursachan fhaicinn.

Bhiodh e fhathast an asgaidh do dh'eileanaich a dhol ann ge-tà.

Tha na tursachan rim faicinn fhathast gun chosgais ged nach eil goireasan ann do luchd-tadhail fhad 's a tha an obair leasachaidh a' dol air adhart.

Thathar an dòchas gum bi i sin deiseil airson seusan na turasachd 2026.