Penarth yn derbyn statws cymuned ddi-blastig

Mae Penarth wedi derbyn statws "cymuned ddi-blastig" gan yr elusen gadwraeth forol, Surfers Against Sewage (SAS) am ei gwaith i leihau'r defnydd o blastig untro.

Mae ymgyrch yn y dref wedi derbyn cefnogaeth gan fusnesau lleol sy'n barod yn lleihau eu defnydd o blastig.

Un o'r trigolion lleol, Anthony Slaughter - sy'n rhan o'r mudiad Gwyrddio Penarth Greening (GPG) - ddechreuodd yr ymgyrch y llynedd ar ôl cyfarfod cyhoeddus a ddenodd llawer o ddiddordeb.

Creodd Mr Slaughter gynllun pum pwynt ynghyd â busnesau a sefydliadau'r dref, gan gynnwys:

• Ysgogi cynllun addysg SAS o ysgolion di-blastig;

• Annog ymrwymiad y cyngor lleol;

• Gweithio gyda busnesau lleol, sefydliadau a grwpiau cymunedol i ledaenu'r neges;

• Lleihau faint o blastig tafladwy sydd yn cael eu defnyddio.

Dywedodd Mr Slaughter: "Mae'r gefnogaeth o'r gymuned wedi bod yn rhan allweddol o lwyddiant yr ymgyrch.

"Roedd hyn yn destun pryder i lawer yn barod, ac roedden nhw'n croesawu'r cyfle i gymryd rhan gyda chamau ymarferol i ddatrys y broblem."

'Annog ailddefnyddio'

Nod cymunedau di-blastig SAS yw dileu'r defnydd o blastig untro mewn cymunedau ar draws y wlad.

Maen nhw'n gobeithio bydd y cynllun pum pwynt yn hybu'r neges ac yn ysbrydoli cymunedau eraill i ddechrau gweithio tuag at yr un nod.

Dywedodd Rachel Yates, swyddog prosiect cymunedau di-blastig SAS: "Mae'n grêt i weld y gwaith sydd wedi cael ei wneud ym Mhenarth i geisio lleihau plastig, codi ymwybyddiaeth ac annog pobl i ailddefnyddio.

"Mae gennym ni dros 400 o gymunedau ar draws Prydain nawr yn gweithio i leihau'r defnydd o blastig a'r effaith mae'n cael ar ein hamgylchedd."