Dyn mewn llys dros farwolaeth seiclwr yn Ynys Môn

Roedd Robert Holmes, 36, yn dad i dri o feibion

Mae dyn lleol 26 oed wedi ymddangos gerbron ynadon ar gyhuddiad o achosi marwolaeth seiclwr yn Ynys Môn y llynedd.

Bu farw Robert Holmes, oedd yn 36 oed a hefyd yn byw yn lleol, wedi gwrthdrawiad ar yr A5025 ym Mhentraeth fis Ebrill diwethaf.

Mae Gareth Morgan o Bentraeth, oedd yn gyrru VW Golf, wedi ei gyhuddo o achosi marwolaeth trwy yrru'n beryglus.

Mewn gwrandawiad yn Llys Ynadon Caernarfon ddydd Iau, fe gafodd y diffynnydd fechnïaeth ddiamod nes ei ymddangosiad llys nesaf yn Llys y Goron Caernarfon ar 1 Mehefin.