Codi ymwybyddiaeth am beryglon croesfannau

Un o'r croesfannau dan sylw fydd yr un yn Sain Ffagan, Caerdyd

Fe fydd tair o groesfannau rheilffordd de Cymru yn dod i sylw mewn diwrnod arbennig i godi ymwybyddiaeth yn rhyngwladol.

Y tair fydd croesfan Sain Ffagan, Llanelli a Phencoed.

Heddlu Trafnidiaeth Prydain a Network Rail fydd yn trafod y croesfannau ddydd Iau.

Bwriad Diwrnod Rhyngwladol Codi Ymwybyddiaeth Croesfannau yw cynorthwyo gyrwyr a cherddwyr i fod yn fwy ymwybodol o'r croesfannau ac i'w cynorthwyo i'w defnyddio yn gywir.

Bydd 40 o wledydd yn cynnal gweithgareddau i hyrwyddo diogelwch ger croesfannau.

Bydd swyddogion Heddlu Trafnidiaeth Prydain a Network Rail yn bresennol ger y croesfannau er mwyn cynnig cyngor a rhannu taflenni fel rhan o raglen addysgu am beryglon croesfannau.

"Mae gyrwyr yn dal i gamddefnyddio croesfannau yn ogystal â cherddwyr," meddai'r Arolygydd Gary Ash o Heddlu Trafnidiaeth Prydain.

Anwybyddu rhybuddion

"Mae 'na hanes o broblemau gyda'r croesfannau y byddwn yn rhoi sylw iddyn nhw heddiw.

"Er gwaetha rhybuddion cyson a gweithredu, mae gyrwyr yn dal i beryglu eu bywydau a bywydau eraill ar y croesfannau.

"Mae'n anhygoel meddwl bod rhai pobl yn dal i beryglu eu bywydau drwy anwybyddu goleuadau rhybudd a'r seiren ac yn mentro dros y groesfan wrth i drên agosáu.

"Addysg yw'r allwedd i bopeth a drwy roi gwybodaeth i bobl am beryglon camddefnyddio croesfannau - a sut i'w defnyddio yn ddiogel - rydym yn gobeithio lleihau nifer yr achosion yno.

"Rydym yn cydweithio yn agos gyda Network Rail yn yr ardaloedd er mwyn gwella gwybodaeth, a lle mae angen, gweithredu yn erbyn y rhai sy'n dal i'w camddefnyddio.

"Fe ddylai'r rhai sy'n diystyru'r gyfraith ac yn anwybyddu'r arwyddion ddisgwyl cael ei herlyn drwy bwyntiau ar eu trwydded yrru, dirwy ac achos llys."