Arddangosfa'n cofio trychineb Senghennydd
- Cyhoeddwyd
Mae arddangosfa newydd yn Y Galeri yng Nghaerffili yn nodi can mlynedd ers trychineb Senghennydd pan laddwyd 439 o weithwyr wedi ffrwydrad.
Mae'r arddangosfa, The Price of Coal, yn cynnwys gwaith gafodd ei ysbrydoli gan gymunedau glofaol.
Mae gwaith pedwar artist yn cael ei ddangos, sef David Carpanini, Valerie Ganz, Osi Rhys Osmond a'r diweddar Nicholas Evans.
Collodd Nicholas Evans ei dad mewn damwain mwyngloddio ac mae ei waith yn dangos y dioddefaint ym mywydau glowyr a'r cymunedau glofaol.
Mae lluniau eraill yn yr arddangosfa yn dylunio tirwedd ddiwydiannol de Cymru.
Cafodd trychineb Senghennydd effaith enfawr ar y gymuned, gan adael 205 o wragedd heb wŷr, 62 o rieni heb feibion a thros 500 o blant heb dad.
Bydd digwyddiadau eraill yn cael eu cynnal i gofio'r trychineb, a ddigwyddodd ar Hydref 14 1913.
Mae'r arddangosfa yn Y Galeri yng Nghaerffili o Hydref 8 tan Tachwedd 2. Mae Y Galeri ar agor 10am - 5pm, dydd Mawrth tan ddydd Sadwrn.