Cyhuddo dau weithiwr Mansel Davies o ffugio cofnodion

Mae Stephen Mansel Davies yn wynebu 19 o gyhuddiadau

Mae rheolwr-gyfarwyddwr ac un o weithwyr cwmni cludiant Mansel Davies wedi ymddangos o flaen ynadon yn Hwlffordd ar gyhuddiadau'n ymwneud â ffugio cofnodion.

Cafodd Stephen Mansel Davies a Jonathan Wyn Phillips eu rhyddhau ar fechnïaeth a byddan nhw'n ymddangos gerbron Llys y Goron Abertawe ar 5 Gorffennaf.

Mae Mr Davies, 57 o Lanfyrnach, Sir Benfro, yn wynebu 19 o gyhuddiadau.

Mae Mr Phillips, 27 o Fynachlog-ddu, Sir Benfro yn wynebu 34 o gyhuddiadau.

'Difrifoldeb'

Dywedodd Lee Reynolds, sy'n erlyn ar ran yr Asiantaeth Safonau Gyrwyr a Cherbydau - y DVSA - fod yr ymchwiliad i gofnodion y cwmni wedi dechrau ar ôl i un o gerbydau'r cwmni gael ei stopio.

Ychwanegodd, oherwydd difrifoldeb y cyhuddiadau, fod angen i'r mater gael ei gyfeirio at Lys y Goron.

Cafodd y ddau ddiffynnydd fechnïaeth amhenodol.

Ni wnaeth bargyfreithwyr ar ran y ddau ddatgan sut y byddant y pledio.

Mae cwmni Mansel Davies o Lanfyrnach, ger Crymych yn cyflogi tua 300 o bobl.