Cyhuddo dyn o lofruddiaeth wedi marwolaeth dyn 47 oed

Mae dyn 34 oed wedi cael ei gyhuddo o lofruddio Duane Keen ym Mlaenafon

Mae dyn 34 oed wedi cael ei gyhuddo o lofruddiaeth mewn cysylltiad â marwolaeth dyn 47 oed yn Nhorfaen fore Gwener.

Cafodd y gwasanaethau brys eu galw i Rhodfa Glan yr Afon ym Mlaenafon yn oriau mân y bore ar 17 Hydref yn dilyn adroddiadau bod dyn wedi cael ei anafu'n ddifrifol.

Fe gadarnhaodd swyddogion fod Duane Keen wedi marw o'i anafiadau yn y fan a'r lle.

Mae'r dyn 34 oed wedi cael ei gyhuddo o lofruddiaeth yn cael ei gadw yn y ddalfa ac mae disgwyl iddo ymddangos o flaen Llys Ynadon Casnewydd ddydd Llun.

Cafodd yr heddlu eu galw i'r digwyddiad yn oriau mân fore Gwener

Wrth roi teyrnged i Mr Keen dywedodd ei deulu: "Bydd teulu a ffrindiau Duane i gyd yn ei golli'n fawr. Does dim geiriau i fynegi'r hyn rydyn ni fel teulu'n mynd trwyddo."

Ychwanegodd y teulu fod Duane "yn focsiwr ac ymladdwr MMA gwych gyda llawer o feltiau i'w enw".

"Roedd wrth ei fodd gyda'i gŵn a mynd allan i gerdded gyda nhw.

"Byddai'n helpu unrhyw un oedd ei angen, ac roedd bob amser ar ben arall y ffôn."

"Duane, roeddet ti'n seren yn y ring, ond roeddet ti'n seren fwy i ni."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.