Angen mwy o bobl i fyw ar Ynys Enlli

Ymgartrefodd Sophie, Rowan, Ned, Sam a Pippin y ci ar Ynys Enlli ym mis Chwefror

Mae teulu a ddewiswyd o gannoedd o bobl i fyw ar Ynys Enlli yn dweud bod angen i bobl fyw ar yr ynys gydol y flwyddyn.

Cafodd Ned a Sophie Scharer eu dewis i fod yn wardeiniaid ar yr ynys ond bu'n rhaid iddynt adael ddiwrnodau wedi iddynt gyrraedd am bod eu mab wedi'i anafu ar y traeth.

Symudodd Mr a Mrs Scharer a'u plant Sam, 10 a Rowan, 12 o gyrion Betws-y-coed i Ynys Enlli ym mis Chwefror.

Dywedodd Mrs Scharer: "Fe wnaeth anaf ein mab wneud i ni sylweddoli yn eitha buan bod yr ynys angen cymuned - mae angen mwy o bobl i fyw yno er mwyn cefnogi a helpu ei gilydd."

Fe wnaeth Mr Scharer aros ar yr ynys er mwyn paratoi ar gyfer dyfodiad y twristiaid.

Y teulu ar eu ffordd i Ynys Enlli ym mis Chwefror

Rhan o ddyletswyddau y wardeiniaid yw paratoi deg cartref ar yr ynys ar gyfer ymwelwyr a darparu adloniant.

Ar un adeg roedd dros gant o bobl yn byw ar Ynys Enlli.

Wedi iddo gael trefn ar y tai dewisodd Mr Scharer fynd adref am nad oedd wedi gweld ei deulu ers cryn amser.

Dywedodd: "Mae'r ynys angen pobl ac mae'r tai 'ma angen pobl. Mae'r ynys angen pobl gydol y flwyddyn.

• Enlli yn chwilio am wardeiniaid newydd

"Mi fyddai modd rhoi pump o'r tai i breswylwyr parhaol - ac mi fyddai rheiny yn gallu rhentu rhan o'r tai ar gyfer gwyliau."

Mae Gareth Roberts sy'n ffermio'n rhannol ar yr ynys a Colin Evans sy'n hwylio'r cwch hefyd yn credu bod angen mwy o bobl.

Dywedodd Mr Evans: "Cafodd Sam druan ddamwain - petai yna fwy o bobl yn byw yma byddid o bosib wedi gallu delio â phopeth yn well.

"Dywedodd Ned wrthyf ei fod yn credu bod yr ynys yn unig a dwi wedi credu hynny ers blynyddoedd.

"Y mwyaf o bobl sydd yma - gorau'i gyd - mae hynny'n haws i bawb."

Dywedodd Mr Roberts: "Petai mwy o bobl yma efallai byddai'r gefnogaeth wedi cadw y teulu yma."

• Bydd modd clywed mwy o'r hanes ar raglen Our Lives: Our Island Home ar BBC 1 am 19:30 ddydd Llun 12 Awst