Agor a gohirio cwest i ddynes, 33, fu farw yn Abersoch
Dywedodd crwner fod ganddi achos rhesymol i amau bod marwolaeth Caren Williams yn un o achosion annaturiol
- Cyhoeddwyd
Mae cwest wedi ei agor i farwolaeth dynes 33 oed ym Mhen Llŷn fis diwethaf.
Bu farw Caren Eleri Williams o ardal Dinas, ger Caernarfon, yn ystod oriau mân fore Gwener, 21 Mehefin.
Dywedodd y crwner Kate Robertson wrth y gwrandawiad ddydd Mercher fod ganddi "achos rhesymol i amau bod marwolaeth Caren Williams yn un o achosion annaturiol".
Ar ryw bwynt yn hwyr yn y nos, clywodd y cwest, bod Ms Williams yn anymatebol (unresponsive).
Clywodd Llys y Crwner yng Nghaernarfon fod Ms Williams, a oedd yn gweithio fel swyddog tai, wedi bod gyda'i phartner yn ystod y dydd.
Er i CPR gael ei gynnal ac i'r gwasanaethau brys gael eu galw, cafodd ei chyhoeddi'n farw yn Nheras Bayview yn Abersoch am 02:30.
Mae archwiliad post mortem wedi'i gynnal ond nid ydy achos y farwolaeth yn hysbys eto.
Cafodd y cwest ei agor a'i ohirio tra bod ymchwiliadau pellach yn cael eu cynnal.
Mae cronfa GoFundMe wedi ei sefydlu ers marwolaeth Ms Williams, sydd wedi codi dros £4,700 erbyn hyn.