Hud a lledrith: Straeon buddugol Radio Cymru
Clawr un o straeon buddugol y gystadleuaeth
- Cyhoeddwyd
Mae'r cyflwynydd Aled Hughes wedi cyhoeddi enwau'r tri awdur ifanc sydd wedi dod yn fuddugol yn ei gystadleuaeth ysgrifennu stori ar BBC Radio Cymru.
Mae'r artistiaid Valériane Leblond, Joshua Morgan (Sketchy Welsh) a Huw Griffiths wedi creu cloriau ar gyfer straeon y tri enillydd sef Jessica o Ysgol ID Hooson, Gruffudd o Ysgol Bro Preseli, a Dylan o Ysgol Gynradd Gymraeg Pen-Y-Groes.
Gofynion y gystadleuaeth oedd ysgrifennu stori dan y thema hud a lledrith.
Casia Wiliam
Beirniad y gystadleuaeth oedd yr awdures Casia Wiliam.
Meddai Casia: "Cafwyd straeon am ddreigiau, straeon am swynion, straeon am gypyrddau hud a gwrachod drwg. Daeth pob math o straeon yn llawn hud a lledrith i law eleni, a'r rheiny'n llawn antur a hwyl!
"Y rhai oedd yn aros yn y cof, ac felly'n dod i'r brig i mi oedd y rhai â syniadau gwreiddiol, gwahanol.
"Mae'r straeon buddugol yn dangos hoel meddwl, iaith afaelgar, a llais clir, unigryw yr awduron. Gobeithio y bydd pawb yn mwynhau'r straeon gymaint ag y gwnes i!"
Darllenwch y dair stori fuddugol:
Y Llithren Hud gan Jessica
Dicw'r Ddraig gan Gruffudd
Bwyd Hud gan Dylan