Artist ifanc o Fôn 'methu disgwyl' i gael bod yn rhan o gig Alanis Morissette

Mae Megan Wyn, 20, yn cyfansoddi ei chaneuon ei hun

Pan fydd y gantores fyd-enwog, Alanis Morissette, yn gwneud cyngerdd yng Nghaerdydd ym mis Gorffennaf, bydd Cymraes yn cael rhannu llwyfan â hi.

Mae'r gantores ifanc o Langefni, Megan Wyn, wedi cael ei dewis i gefnogi'r gantores o Ganada, a bydd artist arall o Gymru - Gwenno - yn perfformio fel rhan o'r noson hefyd.

"Nath manager fi decstio fi a gofyn os o'n i'n rhydd a 'nath o'm deud i ba gig na'm byd; 'nath o jyst deud ei fod o i gig mawr," meddai Megan ar raglen Aled Hughes ar BBC Radio Cymru.

"'Nes i byth feddwl 'sa fo i gig mor fawr â hyn!"

Ar drên oedd hi pan dderbyniodd hi'r neges am y cyfle, meddai, a'r ymateb greddfol oedd i grio.

"O'n i methu prosesu fo am gwpl o ddiwrnodau. Dwi dal ddim yn coelio'r peth – dwi'm yn meddwl 'na i goelio'r peth tan i fi fod yna, os dwi'n onest."

Mae Alanis Morissette yn enw mawr ers y 90au a dechrau'r 00au gyda chaneuon fel 'Ironic', 'Hand in My Pocket' a 'You Oughta Know'

Mae cerddoriaeth wedi bod yn rhan bwysig o fywyd Megan erioed.

Yn gyn-aelod o Gôr Ieuenctid Môn, mae hi bellach yn astudio Busnes Cerddoriaeth yn y brifysgol ym Manceinion.

Yn ôl yn ystod y cyfnod clo fe ddysgodd i ganu'r gitâr, ac mae hi bellach yn cyfansoddi ei chaneuon ei hun ac yn gigio'n rheolaidd.

Y llynedd, teithiodd i Sweden i berfformio mewn gwyliau yno - ond gig Alanis Morissette fydd ei chyngerdd fwyaf, o bell ffordd.

Mae lleoliad y gig wedi gorfod symud oherwydd y galw aruthrol am docynnau, a bydd ffans o bob cwr o'r byd yn tyrru i gaeau Blackweir ddechrau Gorffennaf.

"Mae ei ffans hi mor dedicated. Fedra i'm disgwyl i chwarae iddyn nhw," meddai Megan.

"Mae o bob tro yn neis i gael chwarae i crowd fel'na, lle maen nhw bob tro yn dysgu lot o'r caneuon – mae o'n teimlo'n gymunedol."

Ag hithau ond yn 20 oed, mae hi'n rhy ifanc i gofio rhai o ganeuon enwocaf Alanis Morissette oddi ar ei halbwm, Jagged Little Pill, pan y cawson nhw eu rhyddhau gyntaf yn y 90au.

Er hyn, mae hi'n 'nabod y caneuon yn iawn, meddai.

"Mae Mam wedi eu chwarae nhw i mi wrth i mi dyfu fyny – dwi'n lyfio'r albym yna.

"Fedra i'm disgwyl i gael eu gweiddi-canu nhw yn y crowd!"

Mae'r haf yn argoeli i fod yn un prysur i Megan, gan fod ganddi hefyd gynlluniau i ryddhau rhai o'i chaneuon.

Ond wrth gwrs, yr uchafbwynt fydd cefnogi un o sêr mwya'r byd cerddoriaeth, a hynny ym mhrifddinas Cymru.

"Dwi ddim wedi chwarae yng Nghymru ers oesoedd, felly mae cael dod yn ôl adra i Gymru i 'neud y sioe fwya' dwi 'rioed wedi ei 'neud yn teimlo'n rili sbesial," meddai.

"Dwi mor nerfus. Dwi'n barod yn poeni am be' dwi'n mynd i'w wisgo, sut mae ngwallt i'n mynd i edrych... Ond er mod i'n rili nerfus, dwi'n rili cyffrous hefyd."