Y tân mawr ar Fynydd Bodafon ym Môn o dan reolaeth

Ar un adeg nos Wener roedd y tân maint 1,500 metr sgwâr

Mae Gwasanaeth Tân ac Achub Gogledd Cymru wedi bod yn ceisio rheoli tân mawr ar Fynydd Bodafon ym Môn dros nos a fore Sadwrn.

Amser cinio ddydd Sadwrn dywedodd llefarydd ar ran y Gwasanaeth Tân nad oedd neb wedi cael anaf na'r un eiddo wedi cael difrod.

Ychwanegodd bod y prif fflamau bellach o dan reolaeth ac mai'r gwaith erbyn hyn oedd diffodd y gweddillion oedd yn parhau i losgi.

Ar un adeg nos Wener roedd y tân maint 1,500 metr sgwâr.

Mewn datganiad cynharach fe ddywedodd y gwasanaeth "bod nifer o bobl wedi troi fyny yn yr ardal nos Wener a bod cerbydau'n rhwystro'r llwybrau i'r gwasanaethau brys".

Nos Wener fe ychwanegodd llefarydd ar ran y Gwasanaeth Tân bod ffyrdd ger yr ardal ar gau ac y byddai y criwiau tân yn bresennol am yr oriau nesaf.

Dywedodd llefarydd eu bod wedi cael llawer o alwadau am y digwyddiad, ac roedd yna anogaeth i'r cyhoedd beidio â ffonio 999 i roi gwybod am y digwyddiad gan eu bod eisoes yn bresennol ac yn ymwybodol o'r tân.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.