Cau croesfan rheilffordd oherwydd pryderon diogelwch

Pobl ifanc yn "loetran" ar lwybr dros groesfan rheilffordd yn cyfrannu at gynlluniau i'w chau

Mae croesfan rheilffordd wedi dod yn "risg i ddiogelwch y cyhoedd", mae swyddogion wedi rhybuddio, gyda threnau tawelach ac amlach yn arwain at gynlluniau i gau llwybr cyhoeddus.

Mae lluniau teledu cylch cyfyng hefyd wedi dal pobl ifanc yn "loetran ar y cledrau" rhwng Heol y Fan a Lôn Cefn Carnau i'r dwyrain o ganol tref Caerffili.

Gwelwyd hefyd person yn gwisgo clustffonau wrth fynd â chŵn am dro yn "troi am yn ôl, yn aildroedio'r un llwyr heb unrhyw reswm amlwg".

"Bydd clywed trenau'n dod o bell yn anoddach yn dilyn y newid o drenau diesel i rai trydan," meddai adroddiad gan Gyngor Caerffili.

Mae llun teledu cylch cyfyng arall yn dangos plentyn yn eistedd ar ei sodlau ar drac y rheilffordd

Dywed yr adroddiad fod Metro De Cymru newydd Trafnidiaeth Cymru yn golygu "trydaneiddio a moderneiddio'r rheilffordd a'r gwasanaeth rhwng Caerdydd a Rhymni".

"Bydd y moderneiddio hwn yn cynyddu amlder trenau, ac yn disodli trenau hŷn, diesel gyda rhai trydan mwy newydd."

Mae gan drenau mwy modern "gyfradd cyflymu ac arafu uwch" sydd â'r gallu i deithio'n gyflymach ar draws croesfan reilffordd" nag y mae trenau diesel ar hyn o bryd.

Cyflymder y llinell wrth y groesfan yw 60mya ar gyfer trenau sy'n teithio i gyfeiriad Caerffili, a 65mya i gyfeiriad Caerdydd.

Mae newidiadau i’r amserlen hefyd yn golygu y bydd mwy o drenau’n teithio ar y lein. 124 o gerbydau dyddiol sydd yna ar hyn o bryd ond fe fydd yn codi i 216.

Cytunodd cynghorwyr i gau'r llwybr, ac mae disgwyl i gerddwyr gael eu dargyfeirio ar hyd llwybr arall - pont ffordd gyfagos, yn ôl pob tebyg, sy'n croesi'r rheilffordd.

Dywedodd pwyllgor cabinet hawliau tramwy Cyngor Caerffili fod trydaneiddio'r rheilffordd, cyflwyno trenau mwy modern, a gwasanaethau amlach i gyd yn cyfiawnhau cau'r llwybr troed.