Cynnal ymchwiliad ar ôl i blant ysgol gynradd fynd yn sâl
Mae ymchwiliad wedi'i lansio ar ôl i nifer o blant Ysgol Gynradd Blaenhonddan fynd yn sâl gyda haint
- Cyhoeddwyd
Mae ymchwiliad wedi'i lansio ar ôl i nifer o blant sy'n mynychu'r un ysgol gynradd yng Nghastell-nedd fynd yn sâl gyda haint.
Dywedodd Iechyd Cyhoeddus Cymru eu bod yn gweithio gyda Bwrdd Iechyd Prifysgol Bae Abertawe a Chyngor Castell-nedd Port Talbot i ymchwilio i nifer o achosion o heintiau anadlol acíwt sy'n gysylltiedig ag Ysgol Gynradd Blaenhonddan ym Mryncoch.
"Mae Iechyd Cyhoeddus Cymru'n cefnogi'r ysgol a phartneriaid i leihau lledaeniad salwch ac i roi cyngor iechyd cyhoeddus i rieni a staff," meddai datganiad.
Dywedodd James Adamson o Iechyd Cyhoeddus Cymru: "Rydym yn gofyn i rieni a gwarcheidwaid gadw llygad am symptomau fel peswch, dolur gwddf, twymyn neu anhawster anadlu.
"Rydym yn ymwybodol o sawl achos o heintiau anadlol acíwt sy'n gysylltiedig â'r ysgol ac rydym yn gweithio'n agos gyda Bwrdd Iechyd Prifysgol Bae Abertawe, Cyngor Castell-nedd Port Talbot a'r ysgol i reoli'r sefyllfa."
Ychwanegodd: "Mae tymor y ffliw wedi dechrau yng Nghymru bellach, ac mae heintiau anadlol acíwt yn gyffredin mewn plant, yn enwedig amser yma'r flwyddyn."
Dywedodd mai cael y brechiad ffliw bob blwyddyn yw'r ffordd orau i bobl amddiffyn eu hunain a'u plant.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.