Cymru 'mewn lle da' cyn digwyddiad all ddenu 'biliynau mewn buddsoddiad'

Bydd cannoedd o arweinwyr busnes yn cwrdd yng Nghasnewydd ar gyfer uwchgynhaledd buddsoddi ryngwladol ddydd Llun

Mae Llywodraeth Cymru "eisoes mewn lle da iawn", meddai Ysgrifennydd ar drothwy digwyddiad sydd â'r nod o ddenu "biliynau o bunnoedd o fuddsoddiad" a "miloedd o swyddi" i Gymru.

Ddydd Llun, mi fydd cannoedd o arweinwyr busnes o bob cwr o'r byd yn cwrdd yng Nghasnewydd ar gyfer uwchgynhadledd buddsoddi ryngwladol.

Pan gafodd y digwyddiad ei gyhoeddi yn y gwanwyn fe ddywedodd y Prif Weinidog, Eluned Morgan mai tyfu'r economi oedd ei "phrif flaenoriaeth".

Wrth siarad ar raglen Politics Wales BBC Cymru fe ddywedodd yr Ysgrifennydd Economi, Ynni a Chynllunio, Rebecca Evans fod y llywodraeth "eisoes wedi denu £4.5 biliwn o fuddsoddiad i Gymru" ers cyhoeddi'r uwchgynhadledd a'i bod yn hyderus, "y gwelwn ni fuddsoddiad pellach yn dod i Gymru."

Mae Rebecca Evans yn credu y bydd cyfle i gwmnïau wneud cytundebau newydd ond hefyd creu "cysylltiadau a pherthnasau"

Yn rhan o'r uwchgynhadledd mae cynrychiolwyr wedi cael gwahoddiad i brofi bywyd Cymreig.

Mi fydd yna daith o amgylch felodrom Casnewydd gyda'r beiciwr ac enillydd Tour de France, Geraint Thomas.

Bydd cyfle hefyd i fwynhau bwydydd Cymreig gyda'r cogydd Tom Simmons cyn trafodaeth banel ar arloeswyr chwaraeon gyda'r Farwnes Grey-Thompson, Richard Parks a'r Athro Laura McAllister.

Yn ôl Rebecca Evans mae'r uwchgynhadledd yn "rhoi cyfle i ni roi Cymru ar y map".

"Mae gyda ni bobl yn dod yma o 37 o wahanol wledydd ar draws y byd, 300 o bobl o 250 o fusnesau gwahanol, 150 neu fwy o'r rheiny'n newydd i Gymru", meddai.

Wrth gael ei herio ar sut fydd y llywodraeth yn mesur llwyddiant yr uwchgynhadledd, dywedodd y "bydd 'na yn bendant cyfleoedd i gwblhau cytundebau'n gyflym o ganlyniad i'r uwchgynhadledd fuddsoddi ond mae e hefyd am greu cysylltiadau a pherthnasau".

'Tyfu'r economi sy'n bwysig'

Mae'r llywodraeth yn gobeithio cynyddu buddsoddiad mewn sectorau sydd eisoes yma yng Nghymru – megis lled-ddargludyddion, diwydiannau creadigol, gweithgynhyrchu uwch a gwyddorau bywyd.

Ychwanegodd ei bod hi'n cymryd amser i feithrin perthnasau, ac mae "ymddiriedaeth mor mor bwysig er mwyn sicrhau bod buddsoddwyr yn dod i Gymru".

Wrth gyhoeddi'r digwyddiad ym mis Mawrth fe ddywedodd Eluned Morgan mai tyfu'r economi sy'n bwysig gan addo "pwyslais gwahanol" i gyn-arweinwyr Llafur Cymru.

Mae dros 170,000 o bobl yng Nghymru yn gweithio i gwmnïau sydd mewn perchnogaeth dramor ond dywedodd Eluned Morgan wrth BBC Cymru: "Rwy'n meddwl y gallwn gael mwy o hynny."

Dywedodd llefarydd Cyllid Plaid Cymru, Heledd Fychan ar BBC Politics Wales: "Dwi wir yn gobeithio daw rhywbeth o'r uwchgynhadledd fuddsoddi, ond yn amlwg ry' ni yn gweld rhai o'r cyhoeddiadau nawr yn hwyr iawn yn y dydd, ar ôl i ni gael dros ddau ddegawd i newid ffyniant pethau yma yng Nghymru."

Dywedodd arweinydd y Ceidwadwyr Cymreig, Darren Millar: "Roedd yn ofnadwy mai un o'r penderfyniadau cyntaf a gymerodd Llywodraeth Lafur y DU oedd cael gwared ar y cynllun i drydaneiddio rheilffordd gogledd Cymru, ac wrth gwrs dydyn ni ddim wedi gweld y buddsoddiad hwnnw yn ein rhwydwaith ffyrdd chwaith gan Lywodraeth Cymru.

"Boed hynny'n fuddsoddiad ffordd liniaru'r M4 ar hyd yr A55 neu'n fuddsoddiad mewn pylu'r A40 yr holl ffordd i Abergwaun. Dyna'r math o brosiectau fydd yn cyflawni'r twf sydd ei angen ar Gymru."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.