Duais dha DS Moireach

Shoirbhich leis an ùghdar Leòdhasach, DS Moireach, aig duaisean Chomann nan Ùghdaran 2020.

Bhuannaich a' chiad nobhail aige 'As the Women Lay Dreaming' Duais Paul Torday.

'S e duais a tha seo airson ùghdaran a bheir a-mach a' chiad nobhail aig aois còrr air 60.

Tha Mgr Moireach a' faighinn duais £1,000.

"Bòidhchead"

Tha 'As the Women Lay Dreaming' stèidhichte air coimhearsnachd Leòdhais a' toirt bhliadhnaichean a' faighinn seachad air call na h-Iolaire

"Às dèidh dhomh dìreach beagan duilleagan de As the Women Lay Dreaming a leughadh, bha fios agam gur e seo an leabhar a bha a' dol a bhuannachadh", thuirt tè de na britheamhan, Sarah Waters.

"'S e an leabhar as giorra a bh' air a' gheàrr-liosta, ach 's e leabhar a th' ann a tha làn bòidhchead, bardachd is cridhe", thuirt i.

'S ann à Nis a tha Mgr Moireach is e an-diugh a' fuireach ann an Sealtainn.