Dragh às ùr mu sheirbheisean màthaireil an Gallaibh
- Air fhoillseachadh
Tha luchd-iomairt ann an Gallaibh ag ràdh às ùr gu bheil iad ag iarraidh ath-sgrùdaidh air seirbheisean màthaireil is seirbheisean slàinte eile na sgìre.
Chaidh crathadh a thoirt air seirbheisean màthaireil Ghallaibh ann an 2017 is an t-seirbheis air a cur fo stiùir mhnathan-glùine seach àrd-dhotairean.
Tha mì-thoileachas a' leantainn mun sin is a' mhòr-chuid de bhoireannach ann an Gallaibh aig a bheil dùil ri leanabh a-nise a' dol a dh'Ospadal an Rathaig Mhòir ann an Inbhir Nis.
Sgrìobh luchd-iomairt san sgìre às ùr air a' mhìos seo chaidh gu Rùnaire na Slàinte, Humza Yousaf.
Bha iad feargach gun tuirt Mgr Yousaf nach robh lùghdachadh ann an seirbheisean màthaireil ann an sgìre Mhoireibh math gu leòr, is e a' gealltainn gun robh Riaghaltas na h-Alba airson seirbheis le àrd-dhotairean os a cionn a stèidheachadh às ùr.
Thuirt a' bhuidheann CHAT, taobh a-muigh gu bheil iadsan san dearbh shuidheachadh ri boireannaich Mhoireibh ach gu bheil fiù 's nas fhaide aca ri siubhal.
Ged a fhuair iad litir air ais bho Riaghaltas na h-Alba, cha robh iad air an dòigh leatha no nach do sgrìobh Mgr Yousaf air ais thuca gu pearsanta.
Ath-sgrùdadh
"Thuirt an litir gu bheil fios aig Riaghaltas na h-Alba dè tha tachairt ann an Gallaibh, ach thuirt iad gu bheil ionad màthaireil ùr ann an Inbhir Ùige gus fosgladh a dh'aithghearr. Dh'fhosgail e san Dàmhair", thuirt cathraiche CHAT, Ron Gunnach.
"Tha e mar gum biodh nach eil cuimhne aca oirnn.
"Tha seirbheis mhàthaireil aca ann an Arcaibh fo stiùir mhnathan-glùine ach le taic bho àrd-dhotairean.
"'S e sin a tha sinne ag iarraidh, ach tha sinn cuideachd ag iarraidh ath-sgrùdaidh a bheireadh a-steach seirbheisean slàinte uile sa cheann a tuath", thuirt e.
San litir, thuirt Riaghaltas na h-Alba gu bheil seirbheisean màthaireil nam pàirt de lìonra de sheirbheisean ann an ospadal is gu bheil seo diofraichte bho ospadal gu ospadal.
Thuirt iad mar sin nach gabh coimeas a dhèanamh eadar ath-sgrùdadh mu sheirbheisean màthareil ann am Moireibh is suidheachadh Ghallaibh.
Dh'innis iad cuideachd gu bheil iad airson is gum faigh boireannaich cothrom air seirbheisean màthaireil cho faisg air na sgìrean aca fhèin 's a ghabhas, ach gur e seirbheis cho sàbhailte 's a th' ann a thoirt seachad am prìomh amas.