Mionaid de shàmhchair airson triùir a chaill am beatha ann an tubaist an Loch Abar

Chaidh dìtheanan fhàgail aig an ionad spòrs sa Ghearastan mar chuimhneachan air na deugairean.

Chaidh mionaid de shàmhchair a chumail airson triùir dheugairean a bhàsaich ann an tubaist rathaid ann an Loch Abar oidhche Dhiardaoin.

Tha Comann Camanachd a' Ghearastain air dithis dhiubh ainmeachadh mar Fergus Ward agus Lewis Knox. Thuirt iad gun robh an dithis aca a' cluich dhan phrìomh sgioba agus gun robh dàimhean teaghlaich làidir aca leis a' chluba.

Cho-dhùin an sgioba mionaid de shàmhchair a chumail ro an dà chuid geamaichean a' phrìomh agus an dàrna sgioba aca Disathairne.

Bhàsaich Fergus is Lewis, agus caraid a chaidh ainmeachadh gu h-ionadail mar Jordan Cameron, ann an tubaist le aon chàr air an A830 faisg air Àrasaig.

Thuirt an sgioba gu bheil a' choimhearsnachd air triùir fhireannach òg a chall agus gu bheil co-fhaireachdainn domhainn aca ri na teaghlaichean.

Thuirt iad às dèidh mòran smaoineachaidh gun do co-dhùin iad gum b' e an dòigh as fheàrr urram a nochdadh dha na deugairean a thighinn còmhla agus geamaichean Dhisathairne a chluich.

Thuirt Comann na Camanachd gu bheil co-fhaireachdainn aca ri Comann Camanachd a' Ghearastain agus coimhearsnachd an spòrs gu lèir.

Chùm sgioba ball-coise a' Ghearastain mìonaid de shàmchair ron gheama acasan Disathairne cuideachd.

Chaidh na buidhnean èiginn a ghairm gu an A830 oidhche Dhiardaoin

Tha am Prìomh Mhinistear, John Swinney, agus an Leas-phrìomh Mhinistear, Ceit Fhoirbeis air teachdaireachdan a chur air na meadhanan sòisealta mun tubaist.

Thuirt John Swinney gu bheil e fìor dhuilich cluinntinn mun triùir òg a chaill am beatha san tubaist, agus gu bheil e a' smaoineachadh air teaghlaichean, caraidean agus a' choimhearsnachd aig fad.

Thuirt Ceit Fhoirbeis, ball-pàrlamaid na sgìre far an do thachair an tubaist, nach gabh cho uamhasach is a tha an tubaist a chur an cèill, agus gu bheil a smuaintean agus a h-ùrnaighean le gach neach air a bheil e a' toirt buaidh.

Sgaoil Àrd-Sgoil Loch Abar teachdaireachd air na meadhanan-sòisealta is iad ag ràdh gu bheil an smuaintean leis a h-uile duine air an tug an tubaist buaidh.

Thuirt iad gum bi seirbheisean taice ann do sgoilearan is pàrantan bho Dhiluain.

Iarrtas airson fiosrachaidh

Chaidh na seirbheisean èiginn a ghairm chun tubaist mu 11:15f Diardaoin.

Thachair e air earrann den rathad faisg air taigh-òsta Taigh Bhorghadail.

Thuirt an t-Inspeactair Donnie MacFhionghain bho Phoileas Alba Dihaoine gun robh an smuaintean le teaghlaichean agus caraidean an fheadhainn a bhàsaich san tubaist.

Thuirt e gu bheil an rannsachadh aca a' leantainn agus dh'iarr e air duine sam bith a chunnaic na thachair fios a chur air oifigearan.

Dh'iarr e gu h-àraid cluinntinn bho dhaoine aig a bheil dealbhan dashcam.