Oidhirp air a' Ghàidhlig a neartachadh an Steòrnabhagh

Bidh deasbad ann Dimàirt air mar a ghabhas "inbhe, àite is cleachdadh na Gàidhlig" ann an Steòrnabhagh a leasachadh le sùil gu h-àraidh air buannachdan eaconomach.

'S e Àrainn Steòrnabhaigh ainm a' phròiseict is Comhairle nan Eilean Siar aig an stiùir.

Thèid coimhead air suidheachadh na Gàidhlig ann an Steòrnabhagh an-dràsta, dè na buannachdan a bhiodh ann le àite a' chànain a leasachadh is mar a ghabhadh sin dèanamh.

Tha dòchas ann taic fhaighinn bho ghnothachasan is buidhnean eile gus ro-innleachd a stèidheachadh gus an gnothach a thoirt air adhart.

"S e prìomh adhbhar na coinneimh faighinn a-mach a bheil miann am measg muinntir Steòrnabhaigh is na sgìrean mun cuairt gus inbhe, àite is cleachdadh na Gàidhlig a neartachadh nam beatha làitheil," thuirt Aonghas MacIllinnein, a tha na oifigear coimhearsnachd aig Comhairle nan Eilean Siar.

"Gu h-àraidh daoine is gnìomhachasan nach deach an sàs sa chuspair ron seo, bhiodh e uabhasach math daoine nach eil air a bhith an sàs ann an cùisean na Gàidhlig fhaicinn aig a' choinneimh," thuirt e.

Tha an fheadhainn air cùl a' phròiseict ag ràdh gur e dòighean is ceumannan practaigeach a tha aca san amharc seach "biurocrasaidh".

A rèir Mhgr MhicIllinnein, tha mì-thuigse ann fhathast am measg cuid a thaobh bhuannachdan eaconomach an cois na Gàidhlig.

Tha Àrainn Steòrnabhaigh ag amas air sin atharrachadh.

"Tha a' mhòr-chuid gu math mothachail air na buannachdan an lùib na Gàidhlig a thaobh cultair, ghnothaichean sòisealta agus foghlaim.

"Tha sinn den bheachd, mura h-eil cus ùidh aca sa Ghàidhlig mar chànan, gur dòcha nach eil iad cho mothachail air na buannachdan a th' ann dhan a h-uile duine an lùib na tha a' tighinn a-steach de dh'airgead is de dh'obraichean is de chothroman thairis air an eaconomaidh gu lèir.

"An not a thig a-steach tro bhuidseatan na Gàidhlig, tha i a' cur charan a phocaidean iomadh duine aig a bheil is aig nach eil Gàidhlig air feadh nan Eilean Siar," thuirt e.

Bidh a' choinneamh anns an Lanntair feasgar Dimàirt eadar 2f is 4f.

Bu chòir clàradh le Comhairle nan Eilean Siar le post-d a chur do [e-mail] ro-làimh.