"Cruaidh fheum air boireannaich aig àrd-ìre sa roinn phoblaich sna h-Eileanan"

Dealbh a' sealltainn bhoireannach nan suidhe còmhla timcheall air bùird agus iad aig tachartas gus an cuid beachdan a thoirt seachad mu na cuspairean a tha a' cur dragh orra nan coimhearsnachdan.

Bha timcheall air 20 boireannach an làthair aig a' chiad choinneimh Dimàirt

Marie Duke
Neach-naidheachd Didsiteach
Ag aithris à
Steòrnabhagh

Choinnich buidheann de bhoireannaich Dimàirt ann an Steòrnabhagh gus bruidhinn air na cuspairean a tha cudromach dhaibhsean nan coimhearsnachdan.

Bha seo mar phàirt de sreath thachartasan poblach air an ruith le Co-chruinneachadh Albannach nam Ban (Scottish Women's Convention).

Stèidhich Riaghaltas na h-Alba a' bhuidheann ann an 2003 gus am faigheadh beachdan bhoireannach èisteachd bhon fheadhainn a tha a' dèanamh phoileasaidhean.

Thig aithisg às na seiseanan dhaibhsan a ghabh pàirt annta, do bhuill-phàrlamaid ionadail agus nàiseanta agus do dhaoine aig ìre phoileasaidh na dùthcha.

'S e an t-amas guth a thoirt do bhoireannaich airson aithne a thoirt do na rudan a tha a' cur dragh orra air a bheil iad airidh aig àrd-ìre.

Dealbh a' sealltainn bileag fiosrachaidh mu na seiseanan fiosrachaidh a thathar a' cumail ann an Leòdhas agus na Hearadh an t-seachdain-sa agus lainneard le 'Women's Rights Are Human Rights' sgrìobht' air.

Beachdan bhoireannach gan tional ann an Leòdhas agus na Hearadh

Chaidh da sheisean a chumail ann an Steòrnabhagh. Tha tachartasan air a bhith san Eilean Sgitheanach, Inbhir Ùige, Dùn Dè, Inbhir Nìs agus Dùn Phrìs is Gall-Ghàidhealaibh.

A-measg nan cuspairean air an robh iad a' bruidhinn san Eilean Sgitheanach agus Loch Aillse bha turasachd, taigheadas, còmhdhail, òigridh is foghlam agus slàinte is cùram sòisealta

'S e foghlam, gainnead taic laghail gu h-ionadail a bharrachd air seirbheisean slàinte do bhoireannaich am measg nan cuspairean a thog ceann ann an Steòrnabhagh.

Thuirt Agnes Tolmie, Cathraiche na buidhne: "Tha mise a' fuireach ann an Glaschu 's thèid agam air coiseachd a-steach do dh'oifis an dotair agam 's coinneamh a chur air dòigh, ach tha e coltach gu bheil e air leth doirbh dotair fhaicinn sna h-Eileanan.

"Chan eil sin idir math gu leòr na làithean-sa," thuirt i.

Bha còmhradh cuideachd ann mun chruaidh fheum a th' ann gum bi boireannaich air a' Chomhairle agus ann an àrd-dhreuchdan poblach.

Chithear cuid de na beachdan air an do bhruidhinn na diofar bhuidhnean an seo.

Bidh tachartas eile aca air an Tairbeart air Diardaoin eadar 12:30f agus 2f.