Bàta-teasairginn an t-Òib a-niste an seirbheis a-rithist

Tha bàta-teasairginn an t-Òib anns na Hearadh a-niste ann an seirbheis a-rithist an dèidh trì bliadhna.

An dèidh bliadhna de dhian-trèanadh tha an criutha saor-thoileach a-niste uile deiseil tòiseachadh air faire.

Bha an trèanadh a fhuair iad a' gabhail a-steach iomadh taobh den obair, agus mar phàirt dheth chaidh iad air chuairt gu colaiste an RNLI ann am Poole an Dorset, a thuilleadh air eòlas mionaideach a chur air gnothaichean san t-Òb fhèin.

Tha a' mhòr-chuid den chriutha cuideachd air trèanadh ciad-chùraim fhaighinn an dèidh dian-chùrsa trì làithean.

Tha ceathrar sgiobairean sa chriutha, a bhios ag obair os cionn sgioba de sheachdnar saor-thoileach às an sgìre, le obair-fastaidh a' leantainn.

Feumaidh an criutha trèanadh co-dhiù gach oidhche Luain, agus gu tric còrr air aon oidhche tron t-seachdain a thuilleadh air sin.