Sgrùdadh ga iarraidh mun A9

Sgrìobh Neach-labhairt Còmhdhail nan Làbarach Niall Bibby gu Cathraiche Comataidh Ath-Chuingean Poblach na Pàrlamaid Albannaich, Jackson Carlaw, a dh'iarraidh sgrùdadh pàrlamaideach air oidhirpean gus an A9 a dhèanamh dà-fhillte is e ag ràdh gu bheil an riaghaltas air fàilligeadh gu dona.

Dh'innis Ministear na Còmhdhail Jenny Gilruth an t-seachdain a chaidh gun tèid obair air pàirt dhen rathad eadar Tom Aiteann agus a' Mhòigh a-mach gu tairgse a-rithist agus nach gabh an rathad eadar Peairt is Inbhir Nis a dhèanamh dà-fhillte air fad ro 2025 a-nis, mar a gheall an SNP.

Buaidh Covid is eile

Thuirt Jenny Gilruth gun tug nithean mar Covid, Brexit, is cogadh na h-Ucràin buaidh air a' phròiseact.

Chan eil fhios cuine a bhios an obair deiseil ged a gheall i gun tèid clàr-ama a' chur air dòigh as t-fhoghar.

Tha na Làbaraich ag ràdh nach deach ach mu dheich mìle dhen t-slighe a dhùblachadh bho 2007 agus gun do bhàsaich 13 duine air an rathad an-uiridh.

Fearg

Thuirt Niall Bibby gu bheil fearg air muinntir na Gàidhealtachd agus daoine eile a bhios a' cleachdadh an rathaid.

Tha Mgr Bibby ag ràdh gu bheil e a' tuigse gu bheil ath-chuinge air a dhol chun na comataidh mun A9, agus tha e a' cur ìmpidh orra coimhead ris a' chùis cho luath sa ghabhas.

Bha e ag ràdh gu bheil Làbaraich na h-Alba dhen bheachd gum bu chòir sgrùdadh pàrlamaideach a chumail air mar a dh'fhailicheas an SNP gealltanas gus an A9 eadar Peairt agus Inbhir Nis a dhèanamh dà-fhillte ro 2025 a choileanadh.

Thuirt iad gun toir an suidheachadh droch bhuaidh air muinntir na Gàidhealtachd, an eaconomaidh agus sàbhailteachd.