150 cosnadh airson Neig

Alasdair Jack a' tadhal air Linne Chrombaidh Diardaoin.

Tha tuilleadh fiosrachaidh air a thighinn am bàrr mu phlanaichean airson factaraidh chàballan mara ann an Neig.

Dhearbh a' chompanaidh Iapanach Sumitomo Electric gun cosg iad £200m air an leasachadh agus tha dùil gun tèid 150 cosnadh fìor sgileil a chruthachadh.

Chaidh tuathan-gaoithe aig muir a thogail ann an Linne Mhoireibh mar-tha, agus tha dòchas ann gun leudaich an gnìomhachas gu mòr.

Bidh na tuathan-gaoithe air an ceangal ris a' ghriod nàiseanta le càballan fada dealain fon mhuir.

Thàinig an naidheachd fhad 's a bha am Prìomhaire Rishi Sunak ann an Iapan agus nuair a bha Rùnaire na h-Alba Alasdair Jack a' tadhal air Linne Chrombaidh.