Dearbhadh air cidhe ùr oidhche do dh'aiseagan am Malaig

Gheall Riaghaltas na h-Alba £6.4m ann am maoineachadh calpa airson acarsaid oidhche do dh'aiseagan ann am Malaig.

Tha dùil gun tòisich obair air a' ghoireas ùr, far am bi bàtaichean-aiseig a' ceangal air an oidhche, as t-fhoghar am-bliadhna, 's gun cuir e ri seasmhachd sheirbheisean aiseig eadar Malaig agus Loch Baghasdail, Armadal 's na h-Eileanan Tarsainn.

Bha Rùnaire na Còmhdhail Fiona Hyslop a' tadhal air Malaig agus na h-Eileanan Tarsainn nuair a dh'fhoillsich i an naidheachd Diciadain.

"A' tadhal air Malaig an-diugh tha mi toilichte a dhearbhadh gun toir Riaghaltas na h-Alba £6.4m seachad airson acarsaid ùr oidhche ann an Cala Mhalaig," thuirt i.

"Cuiridh seo ri ceangalachd nan eileanan againn agus cho earbsach 's a tha seirbheisean-aiseig ChalMac do mhuinntir an àite agus do dh'eileanaich, choimhearsnachdan agus ghnothachasan."

Thuirt Ms Hyslop cuideachd gun cuir an Riaghaltas £530m ri lìonra nan aiseagan san fharsainneachd, gach cuid air a' chosta an iar agus anns na h-Eileanan mu Thuath.

'S ann an ceann a-muigh a' chala a bhios an goireas ùr

Thuirt Ùghdarras Port Mhalaig gur e seo a' chiad cheum ann an sreath leasachaidhean air bun-structar aiseig a' chala ris a bheil dùil.