Sgoil Dhruimein an 'suidheachadh èiginneach'

Dh' innis Comhairle nam Pàrant aig Sgoil Dhruimein ann an Inbhir Nis gu bheil an sgoil ann an suidheachadh èiginneach.

Thuirt Comhairle na Gàidhealtachd gum bi neach-taic teaghlaich agus neach-obrach meidigeach làn-ùine ag obair anns an sgoil shònraichte.

Tha pàrantan ag ràdh ge-tà nach eil na dreuchdan sin gu mòran feum agus gur e nurs a tha a dhìth airson dèiligeadh ris na feumlachdan a bharrachd a tha aig a' chloinn.

Chan eil ach beagan bhliadhnaichean ann bhon a fhuair sgoil Dhruimein duais bho Chomann Nàiseanta an Òtasaim agus iad ag aithneachadh na h-obrach a tha luchd-obrach a' dèanamh airson dèiligeadh ris na feumalachdan a bharrachd a tha aig a' chloinn anns an sgoil.

Tha pàrantan mothachail air an obair mhòir sin anns an sgoil shònraichte cuideachd.

Ach tha iadsan agus na h-aonaidhean a tha a' riochdachadh an luchd-obrach ag ràdh nach eil an suidheachadh anns an sgoil sàbhailte, le cion luchd-obrach agus an luchd-obrach a th' ann an-dràsta air leth sgìth.

Dh'innis Comhairle na Gàidhealtachd gum bi neach-taic teaghlaich agus neach-obrach meidigeach làn-ùine ag obair anns an sgoil.

Ach tha Comhairle nam Pàrant ag ràdh nach e sin a tha a dhìth.

Thuirt Lindsay Fulton bhon bhuidhinn nach bi an luchd-obrach sin a' dol an sàs gu dìreach leis a' chloinn.

"Tha iad a' ceangail le chèile nam feumalachdan meidigach aig na teaghlaichean anns an sgoil agus taobh a-muigh na sgoile.

"Mar sin, cha bhiodh e ann airson taic a thoirt le biadhachadh a-staigh do na h-ìrean àrda de dh'fheumalachdan cùraim meidigich na cloinne.

"Cha bhi dad den t-seòrsa sin ann, sin an tuigse a tha againne", thuirt i.

Dh'innis an t-ùghdarras ionadail gun tòisich an neach-taic teaghlaich san Lùnastal.

Thèid an dreuchd eile a shasanachd.

Bidh na dreuchdan sin air am maoineachadh le taic-airgid bho Phrògram Slàinte Theaghlaichean an riaghaltais.

Dh'iarr Comhairle nam Pàrant gum biodh nurs anns an sgoil, mar a bha aca roimhe seo.

"Tha Sgoil Dhruimein ann an suidheachadh èiginneach", thuirt Lindsay Fulton.

"Chan eil foghlam aca a chionn 's gum feumar dèiligeadh leis na feumalachdan cùraim aca an toiseach.

"Nan robh sin na àite, bheireadh sin faochadh dhan a h-uile.

"Chan urrainn dhomh a chur ann am faclan, bhiodh pàrantan toilichte, bhiodh iad saorsnail nan robh fios aca gun urrainn dhaibh an cuid chloinn a chur dhan sgoil gu sàbhailte."

Dh'iarr BBC Naidheachdan fiosrachadh mu dhleastanasan an luchd-obrach ùra seo, ach cha d'fhuairear fios air ais fhathast.

Chan eil fios cinnteach ann fhathast cia mheud tidsear a bhios anns an sgoil an deidh an t-samhraidh agus tha amharras ann gum bi 46 sgoilear a bharrachd anns an sgoil bhon a chaidh a thogail anns a' chiad dol a-mach.