Luchd-teasairginn òga na Hearadh

Bha Raonaid Chaimbeul am measg nan stiùireadairean RNLI as òige am Breatainn nuair a chaidh a trèanadh ann an 2022

Chaidh stèisean an RNLI san t-Òb an ceann a deas na Hearadh a stèidheachadh ann an 2012.

Cha bheag na dùbhlain a th' air a bhith aig an t-seirbheis ionadail bhon uairsin.

Aig deireadh 2019, bha amannan ann far nach robh daoine gu leòr aca airson a dhol gu muir agus am bàta-teasairginn clas Shannon, an Stella and Humfrey Berkeley, feumach air seachdnar chriutha.

Le àireamhan an sgioba cho ìosal agus le buaidh Covid bha trì bliadhna far nach robh seirbheis ann agus bha ceist mhòr an gabhadh a tòiseachadh às ùr.

An dèidh strì mhòr a rinn a' choimhearsnachd thàinig am bàta-teasairginn ùr Atlantic 85 air a bheil John and Louisa Fisher.

Tha i nas lugha agus 's e dìreach triùir a tha a dhìth airson a dhol a-mach.

Rinn an criutha ùr bliadhna de thrèanadh agus chaidh an t-seirbheis ath-stèidheachadh ann an 2022.

Criutha an t-Òib aig seisean trèanaidh

Tha 14 daoine air an trèanadh airson a dhol gu muir agus deiseil airson gairm-èiginn a fhreagairt aig uair sam bith. 'S e boireannaich a tha ann an ceathrar dhiubh.

Ann an 2022 bha tè aca, Raonaid Chaimbeul, a tha 21 a-nis, am measg an fheadhainn a b' òige riamh a fhuair trèanadh mar stiùireadair leis an RNLI.

'S e croitear a th' innte. Thill i fhèin is a piuthar à turas a dh'Astrailia agus Sealainn Nuadh an-uiridh far an robh iad ag obair air tuathanas.

Raonaid agus a h-athair, Raymond Caimbeul, trang ann am Pabaigh

Trang agus gu bheil i le na h-uain thall ann am Pabaigh, tha i cuideachd ag obair airson tiocaid seòlaidh a leigeas leatha bàta a thoirt a-mach chun an eilein ann an Caolas na Hearadh.

Ged a bha cur na mara oirre a' chiad turas a chaidh a gairm a-mach cha do chuir sin dheth i.

“Tha am bàta-teasairginn mar phàirt mhòr de mo bheatha agus tha e air misneachd a thoirt dhomh.

''S e an rud as fhèarr leam am faireachdainn a th' agad nuair a tha thu air cuideachadh a thoirt do chuideigin a tha ann an cunnart agus a bhith ag obair còmhla ri criutha sgoinneil," thuirt Raonaid.

Thòisich Eilidh Nic a' Mhaolain leis an RNLI bho chionn sia bliadhna

Bha Raonaid ann am Poole ann an Dorset bho chionn ghoirid airson co-labhairt Women in SAR (Search and Rescue).

Còmhla rithe bha a caraid Eilidh Nic a' Mhaolain, 23, a th' air a bhith na ball de sgioba RNLI an t-Òib airson sia bliadhna.

Tha an obair san fhuil aice oir bha a h-athair an sàs san t-seirbheis.

Tha Eilidh ag obair na h-innleadair le Openreach an dèidh preantasachd a dhèanamh.

"Tha mi a' smaoineachadh gu bheil e air leth cudromach gun tèid daoine òga an sàs ann an obair a' bhàta-theasairginn, mar phàirt den chriutha neo a' togail airgid.

"Feumaidh an t-seirbheis òigridh airson a cumail a' dol. Chanainn-sa riutha thigibh agus feuchaibh air co-dhiù! Tha sinn uile iomagaineach an toiseach ach tha sgioba fìor mhath againn agus chan fhada gus am bi sibh a' faireachdainn comhfhurtail," thuirt Eilidh.

Jethro Lomas, a thàinig a dh'fhuireach sna Hearadh ann an 2017

Ghluais Jethro Lomas, 32, dha na Hearadh bho chionn seachd bliadhna, agus chaidh e na bhall de sgioba an RNLI san t-Òb bho chionn dà bhliadhna.

Tha e a' ruith B&B agus air an oidhche bidh e a' gearradh an fheòir do mhuinntir na sgìre, sia là san t-seachdain.

"Tha e a' còrdadh rium a bhith a' toirt taic dhan choimhearsnachd tron RNLI, a bhith a' cuideachadh luchd-turais, daoine bhon choimhearsnachd agus iasgairean.

"Chòrd an trèanadh a fhuair mi ann am Poole gu mòr rium cuideachd ach 's e an rud as fheàrr leam a bhith a' seòladh aig astar air a' bhàta-theasairginn," thuirt e.

Eilidh Nic a' Mhaolain aig an stiùir air eacarsaich trèanaidh

A bharrachd air an obair làitheil aig a' chriutha tha iad deònach na grunn uairean de thìde a thoirt seachad a' trèanadh leis an RNLI agus na sgilean aca a chumail aig ìre.

Chaidh an gairm a-mach 16 tursan uile gu lèir bho chaidh an ath-stèidheachadh ann an 2022, agus feumaidh iad a bhith deiseil aig àm sam bith agus ann an sìde sam bith a dhol a-mach agus cobhair a dhèanamh air daoine.

Tha iad a' brosnachadh dhaoine eile sa choimhearsanchd a dhol an sàs san t-seirbheis.

'S i Catriona Nic'Illinnein Manaidsear Stèisean an t-Òib: "Tha an dòras fosgailte fad na h-ùine, duine sam bith aig a bheil ùidh, faodaidh iad tighinn a-steach.

"'S e obair chruaidh a th’ ann ach tha dòigh againn obrachadh timcheall air a h-uile seòrsa suidheachadh," thuirt i.