Fèis-chiùil Bhelladrum ga cumail airson an 21mh turas

Natasha BedingfieldTùs an deilbh, Getty Images
Fo-thiotal an deilbh,

Tha Natasha Bedingfield am measg nam prìomh cheòladairean aig Fèis Bhelladrum Tartan Heart am-bliadhna

  • Air fhoillseachadh

Tha Fèis Bhelladrum Tartan Heart faisg air a' Mhanchainn a' tòiseachadh Diardaoin.

On a thòisich an fhèis ann an 2004 tha i air fàs bho thachartas aon là do 2,000 duine a-mhàin gu cruinneachadh mòr thairis air trì là a tha a' tarraing còrr is 20,000.

Tha Paul Heaton, CMAT agus Texas am measg an luchd-ciùil a bhios air an àrd-ùrlar am-bliadhna.

Lewis CapaldiTùs an deilbh, Getty Images
Fo-thiotal an deilbh,

Tha Lewis Capaldi air nochdadh aig Bella roimhe

Chaidh an fhèis a stèidheachadh le Joe Gibbs, leis a bheil Oighreachd Bhelladrum far a bheil i air a cumail.

Tha am fearann, mu 12 mìle siar air Inbhir Nis, faisg air a' Mhanachainn agus Cill Targlain, air a bhith le teaghlach Mhgr Gibbs bho 1857.

Chaidh an fhèis a ghabhail thairis leis a' chompanaidh Kilimanjaro Live ann an 2018 ach tha i air a ruith fhathast le sgioba a tha stèidhichte air a' Ghàidhealtachd.

Dithis aig Fèis Bhelladrum air an èideadh mar Oor Wullie agus Minnie the Minx
Fo-thiotal an deilbh,

Dithis air an èideadh mar Oor Wullie agus Minnie nuair a b' e cartùnaichean cuspair na fèise ann an 2023

Tha an leithid Lewis Capaldi, Frightened Rabbit, Bastille, Twin Atlantic, Paloma Faith, Callum Beattie agus Sir Tom Jones air nochdadh aig an fhèis thar nam bliadhnaichean.

Tha an tachartas aithnichte airson cho freagarrach agus fàilteachail 's a tha e do theaghlaichean.

Tha cuideachd seipeal beag air an oighreachd far a bheil càraidean air pòsadh fhad 's a tha an fhèis a' dol.

Gach bliadhna tha cuspair diofraichte ann agus tha cuireadh ga thoirt do luchd-frithealaidh na fèise èideadh a chur orra dha rèir.

Ann an 2023, b' e an cuspair cartùnaichean. Am-bliadhna 's e filmichean.

Sharleen Spiteri bhon chòmhlan TexasTùs an deilbh, Getty Images
Fo-thiotal an deilbh,

Bidh an còmhlan Texas a' toirt na fèise gu ceann Disathairne

Bidh còrr agus 40 seinneadair agus còmhlan rin cluinntinn Disathairne a-mhain - luchd-ciùil stèidhichte agus tàlant ùr nam measg.

Bidh Paul Heaton, a b' àbhaist a bhith a' seinn leis a' chòmhlan The Beautiful South ann, cho math ris na seinneadairean Natasha Bedingfield agus Tom Walker.

Bidh Supergrass ann agus bidh Texas a' toirt na fèise gu ceann.

Am measg nan ceòladairean Albannach eile bidh Tide Lines, Torridon, Beluga Lagoon, Nati, agus The Dazed Digital Age.

Tha dùil gum bi ùidh mhòr aig na bhios an làthair san t-seinneadair Èireannach, CMAT, an dèidh cho mòr agus a chòrd i ri luchd-frithealaidh Ghlastonbury.

CMATTùs an deilbh, Getty Images
Fo-thiotal an deilbh,

Tha beachd ann gum faod CMAT nochdadh air prìomh àrd-ùrlar Ghlastonbury fhathast

Tha trafaig air a bhith na thriobalid aig Belladrum. Ann an 2023 nuair a chaidh 25,000 ticead a reic bha cuid a' gearan gun robh aca ri feitheamh ùine mhòr airson faighinn ann.

Bidh busaichean a' ruith à Inbhir Nis, Inbhir Pheotharain, An Todhar agus A' Mhanachainn chun na làraich, agus thathar ag iarraidh air daoine tighinn còmhla ann an aon charbad ma 's urrainn dhaibh.

Tha dùil ri sìde an ìre mhath fàbharach le smugraich uisge Dihaoine ach turadh le greisean grianach Disathairne far am bi i cho blàth ri 19C.

Bidh an fhèis ri fhaicinn air BBC ALBA agus air an iPlayer.