A' Ghàidhlig a-nis ri fhaighinn air goireas air-loidhne Woolaroo

Chuir SMO eadar-theangachaidhean agus clàraidhean-fuaime Gàidhlig ri Woolaroo

Dh'innis Sabhal Mòr Ostaig gu bheil iad air a bhith ag obair còmhla ri Google gus a' Ghàidhlig a chur ri goireas-cànain air-loidhne.

'S e goireas fosgailte a tha ann am Woolaroo leis am faod luchd-cleachdaidh dealbh a thogail agus faclan fhaighinn airson rudan a tha mun cuairt orra ann an cànanan a tha fo chunnart.

Tha e a' cleachdadh AI gus nithean aithneachadh agus an uairsin a' dèanamh ceangal ri eadar-theangachaidhean a tha luchd-rannsachaidh cànain air a chur ris.

Chaidh a chur air bhonn ann an 2021 le 10 diofar chànanan rim faotainn aig an ìre sin.

A-nis tha a' Ghàidhlig am measg 30 cànanan a tha rim faighinn, agus SMO air eadar-theangachaidhean agus clàraidhean-fuaime a chur ris.

"Leis a' ghoireas seo faodaidh daoine a' Ghàidhlig fhaicinn agus a chleachdadh nam beatha làitheil", thuirt Iain Fionnlagh MacLeòid, Manaidsear Leasachaidh a' Ghnothachais aig Sabhal Mòr Ostaig

"'S urrainn do dhaoine Gàidhlig a lorg am measg nan nithean a tha mun cuairt orra agus aig an aon àm bidh iad a' cur eòlas air tè de mhion-chànanan an t-saoghail."

Thuirt Chance Coughenour, Àrd-mhanaidsear a' Phrògraim aig Google: Ealain is Cultar: "Tha sinn air ar dòigh glan gu bheil sinn a' cur tuilleadh chànanan ri Woolaroo am-bliadhna bho Afraga, Brasil, Meagsago, An Tuirc, agus Alba.

"Tha Sabhal Mòr Ostaig air obair fìor chudromach a dhèanamh a thaobh a' phàirt Ghàidhlig den phròiseact, agus tha sinn an dòchas gum brosnaich seo barrachd dhaoine gu bhith a' togail ceangal rithe agus a' dèanamh gàirdeachais ris a' Ghàidhlig."