Sgeilfichean bhùthan a' Cho-op sna h-eileanan falamh an dèidh ionnsaigh shaidhbeir

Bogsaichean falamh ann am bùth a' Cho-op am Port Rìgh

Tha cuid de bhùthan a' Cho-op ann an eileanan na h-Alba air a bhith a' ruith a-mach à biadh ùr an dèidh mar a thugadh ionnsaigh shaidhbeir air a' chompanaidh.

Thug na h-eucoirich buaidh air bùthan san Eilean Sgitheanach agus sna h-Eileanan an Iar am measg eile.

Dh'innis a' chompanaidh dhan BhBC Dihaoine gun deach tòrr dàta mun luchd-ceannaich aca a ghoid san ionnsaigh air na siostaman aca.

Thug na thachair buaidh cuideachd air òrdughan gu cuid de bhùthan eile na companaidh air feadh na Rìoghachd Aonaichte.

Tha bùthan gann de ghlasraich, measan, feòil agus biadh-bainne.

Tha gainnead de ghlasraich is measan air sgeilfichean a' Cho-op ann an Steòrnabhagh

Thug Ionad Nàiseanta na Tèarainteachd Saidhbeir (NCSC) rabhadh gun robh na h-eucoirich a bha a' toirt nan ionnsaighean saidhbeir air bùthan Bhreatainn a' toirt a chreids gur e luchd-taice IT a bh' annta airson briseadh a-steach gu na siostaman aca.

A bharrachd air a' Cho-op, tha a' bhuidheann eucoireach air ionnsaigh a thoirt air Marks & Spencer agus Harrods sa chola-deug mu dheireadh, agus thug iad rabhadh gun toir iad ionnsaighean eile a dh'aithghearr.

Tha an NCSC a' toirt comhairle do bhuidhnean ag iarraidh orra ath-sgrùdadh a dhèanamh air a' phròiseas aca airson facail-fhaire atharrachadh mar dhòigh ionnsaigh a sheachnadh.

Cha mhòr gu bheil feòil agus biadh-bainne air fhàgail sa Cho-op ann an Steòrnabhagh