Beachd gur e iolaire-mhara a dh'fhalbh le searraich Shealtainneach an Uibhist

Tha Dòmhnall Iain Camshron cha mhòr cinnteach às gur e iolairean-mara as coireach gun do chaill e na h-uimhir de shearraich am-bliadhna

Tha croitear ann an Uibhist a Deas a' cumail a-mach gur e iolairean-mara as coireach gun do chaill e còig de na h-eich oga Sealtainneach aige am-bliadhna.

Tha Dòmhnall Iain Camshron à Loch Sgioport ag ràdh nach eil sgeul air closaichean fiù 's.

Thuirt e: "Tha mi air an talamh a shiubhal agus chan eil mi a' faighinn lorg air sian, beò no marbh."

Ghabh e ris nach fhaca e fhèin iolaire a' breith air searraich ach gum faca e tè a' sgèith os an cionn iomadach trup.

Tha NàdarAlba ag ràdh nach eil dearbhadh sam bith ann gur e iolairean-mara a dh'fhalbh leis na searraich.

Tha sgaradh bheachd ann mu bhuaidh nan iolairean-mara air stoc

Tha Mgr Camshron ag ràdh gu bheil fios aig daoine a tha ag àrach bheathaichean gun tog iolaire-mhara laogh fèidh sa bheil cuideam nas motha na searrach.

"Tha sin ag innse dhomh nach eil strì aig iolaire searrach a thogail," thuirt e.

'S e an rud as miosa, tha e ag ràdh, feuchainn ri mìneachadh don nighinn bhig aige dè a dh'èirich dha na h-eich bheaga.

"'S e peutan a th' ann dhuinne. 'S e am beòshlainte againn a th' ann," thuirt e.

Tha e a' ruith companaidh air a bheil Long Island Retreats a' gealltainn do luchd-turais gum faic iad searraich.

Thuirt e: "Nochdaidh iad agus chan eil searraich idir ann - dè thachair dhaibh?"

Tha Dòmhnall Iain Camshron ag ràdh gur e piatain a th' anns na h-eich bheaga ach cuideachd am beòshlainte

Thuirt e gu bheil e ag iarraidh air na h-ùghdarrasan smachd a chur air na h-eòin.

Chan eil fhios aca le cinnt, tha e a' cumail a-mach, cia mheud pàidhir de dh'iolairean-mara a tha air Oighreachd Uibhist a Deas.

"Chan eil iadsan ach a' falbh le tuairmse air cia mheud eun a th' againn agus dè am milleadh a tha iad a' dèanamh.

"'S e iadsan a thug na h-iolairean a-staigh dhan choimhearsnachd againn agus tha iad a' toirt buaidh mhòr, mhòr."

Thuirt NàdarAlba gun dèanadh iad sgrùdadh ann an Uibhist a Deas agus Uibhist a Tuath a dh'fhaicinn a bheil fianais ann air gearan Mhgr Chamshroin.