Bhàsaich fear-motar-baidhg an dèidh tubaiste air an A9 ann an Gallaibh

Bhàsaich Lorne MacMhaoilein dà sheachdain an dèidh na tubaiste ann an Gallaibh

Tha fireannach air bàsachadh an dèidh mar a bha am motar-baidhg aige an sàs ann an tubaist air an A9 faisg air Latharan ann an Gallaibh.

Bha Lorne MacMhaoilein, à Àrasaig, air motar-baidhg dubh a bhuail ann an càr Peugeot liath mu dhà mhìle tuath air Latharan aig 09:50 madainn na Sàbaid an 10mh den Lùnastal.

Chaidh Mgr MacMhaoilein a sgèith a dh'Ospadal Rìoghail Obair Dheathan far an do bhàsaich e Diluain.

Chaidh dràibhear a' chàir agus neach-siubhail a thoirt chun an ospadail ach chaidh leigeil leotha falbh greis an dèidh sin.

Chaidh boireannach a chur an grèim agus fo chasaid an co-cheangal ri eucoir dràibhidh, agus nochdaidh i sa chùirt fhathast.

Thuirt teaghlach Mhgr MhicMhaoilein gun robh a bhàs na bhuille mhòr.

Ann am brath-naidheachd a sgaoil iad tro Phoileas Alba, thuirt iad: "'S e an companach, athair, mac, bràthair, uncail as fheàrr a bh' ann agus na charaid do mhòran eile."

Tha na poilis air iarraidh air duine sam bith le fiosrachadh mu na thachair fios a chur thuca.