Thugadh 40 luchd-siubhail far trèana an dèidh do cheò nochdadh ann

Chleachd luchd-siubhail fàraidhean airson faighinn far an trèana an dèidh ceò nochdadh ann an cuid de na carbadan

Chaidh 40 luchd-siubhail a thoirt far trèana ann am Peairt agus Cinn Rois an dèidh aithrisean gun robh carbadan "a' lìonadh le ceò".

Dh'fhàg an trèana Inbhir Nis a' dèanamh air Glaschu aig 05:36 ach stad e eadar Gleann Eagais agus Dùn Bhlathain nuair a chaidh ceò aithneachadh.

Chaidh luchd-siubhail a thoirt far an trèana agus a ghluasad gu seirbheis eile.

Thuirt ScotRail gum faodadh gum bi buaidh aig na thachair air seirbheisean eadar Glaschu agus Inbhir Nis is Obair Dheathain agus à Dùn Èideann cuideachd.

Chan eil aithris ann gun deach duine a ghoirteachadh agus thathar a' toirt an trèana air ais a Ghlaschu.

"Tòrr ceò ann"

Dh'innis tè a bh' air bòrd, Sarah MacMath, 35, do BhBC Naidheachdan: "Mhothaich sinn fàileadh neònach eadar an Aghaidh Mhòr agus Ceann a' Ghiùthsaich.

"Chaidh mi nam chadal agus dhùisg mi nuair a stad an trèana faisg air Gleann Eagais agus bha na h-uimhir de cheò sa charbad.

Thuirt i gun deach an luchd-siubhail a ghluasad tro charbad eile san robh cuideachd "tòrr ceò ann".

"Bhathar a' cumail fiosrachaidh rinn agus a' dèanamh cinnteach nach robh sinn a' faireachdainn tinn le bhith a' gabhail ceò air ar anail.

"Chaidh aca air trèana eile fhaighinn dhuinn agus chaidh sinn sìos fàraidhean dhan ghrunnd agus chuidich iad sinn air an loidhne-rèile dhan trèana cobhair."

Thuirt i gun robh e "eagalach" an ceò fhaicinn, ach gun do làimhsich an luchd-obrach ris an t-suidheachadh ann an dòigh "fìor mhath".

Thuirt Mark Ilderton, stiùiriche sheirbheisean ScotRail: "Chaidh stad a chur air an trèana 05:36 à Inbhir Nis gu ruige Stèisean Sràid na Banrighinn an Glaschu faisg air Gleann Eagais sa mhadainn an dèidh aithrisean gun robh ceò ann am fear de na carbadan.

"'S e am prìomhachas againn sàbhailteachd a h-uile duine a bh' air bòrd, agus luchd-siubhail a thoirt gu sàbhailte far an trèana."