Triùir dheugairean air am marbhadh an tubaist an Loch Abar

Chaill triùir dheugairean am beatha ann an tubaist-rathaid ann an Loch Abar.

Thachair an tubaist air an A830 faisg air Àrasaig mu 11:15f Diardaoin.

Cha robh ach aon charbad, càr Ford Fiesta geal, an sàs.

Chaidh triùir - dràibhear a' chàr agus dithis a bha a' siubhal ann - a dhearbhadh marbh aig an làraich.

Thuirt Poileas Alba gu bheil iad a' tuigsinn gur e fireannaich is deugairean a bh' annta air fad.

Bha an A830 dùinte fhad 's a rinneadh rannsachadh, agus dh'fhosgail e às ùr aig 11:55m Dihaoine.

Thuirt na Poilis gu bheil an rannsachadh aca a' leantainn agus dh'iarr iad air duine sam bith a chunnaic na thachair fios a chur air oifigearan.

Dh'iarradh iad cluinntinn gu h-àraid bho dhaoine aig a bheil dealbhan dashcam.

Thachair an tubaist air pìos den rathad faisg air Taigh-òsta Taigh Bhorghadail.

Faodar fios a chur air na Poilis mun tubaist seo air an àireimh-fòna 101, a' toirt seachad na h-àireimh-cùise 3941 den 28mh là den Lùnastal 2025.

Dh'innis na Poilis nach tèid na fir ainmeachadh aig an ìre seo.

Sgaoil Àrd-sgoil Loch Abair teachdaireachd air na meadhanan-sòisealta is iad ag ràdh gu bheil an smuaintean leis a h-uile duine air an tug an tubaist buaidh.

Thuirt iad gum bi seirbheisean taice ann do sgoilearan is pàrantan bho Dhiluain.