Suirbhidh air iarrtas FtMG san Eilean Sgitheanach is Ratharsair

Tha suirbhidh san Eilean Sgitheanach agus Ratharsair a' tomhas dè an t-iarrtas a bhios air foghlam tro mheadhan na Gàidhlig san àm ri teachd.

Thàinig àrdachadh mòr air an àireimh chloinne ann am foghlam Gàidhlig san sgìre bho dh'fhosgail Bun-sgoil Ghàidhlig Phort Rìgh agus tha Comann nam Pàrant Phort Rìgh airson faighinn a-mach am mair sin.

Tha iad ag ràdh gun robh 125 sgoilear ann an FtMG san sgìre eadar sgoil-àraich agus P7 ann an 2008/09 nuair a thòisich co-chomhairle air bun-sgoil Ghàidhlig a stèidheachadh ann am Port Rìgh .

Bha am figear sin air tuiteam bho 131 ann an 2003/04.

Dh'fhosgail Bun-Sgoil Ghàidhlig Phort Rìgh ann an 2018.

Ann an 2024/25 bha am figear air èirigh gu 241 - àrdachadh 93% air 2008/09.

Bha an t-àrdachadh sin ann a dh'aindeoin 's gun robh Comhairle na Gàidhealtachd an dùil gur ann a' sìor thuiteam a bhiodh an t-iarrtas san sgìre - bha iad fhèin a' tomhas nach biodh air fhàgail ach 119 ann an 2012/13.

Leis nach robh dùil ris an fhàs a th' air a bhith ann, tha Comann nam Pàrant Phort Rìgh airson dèanamh cinnteach gum bithear deiseil airson goireasan a leudachadh mu choinneimh iarrtas a bharrachd a bhith ann.

Tha àireamhan san sgoil-àraich ann am Port Rìgh a-niste cha mhòr làn, agus tha a' bhuidheann ag iarraidh fianais a bharrachd a shealltainn gun lean an soirbheachas a th' air a bhith ann.

Tha iad a' dèanamh rannsachaidh air iarrtas eadar 0-18 air feadh an Eilein Sgitheanaich agus ann an Ratharsair.

"Tha sinn airson dèanamh cinnteach gu bheil cothrom aig a h-uile pàrant a' chlann aca a chur gu foghlam tro mheadhan na Gàidhlig aig ìre cho tràth 's a ghabhas," thuirt Faye NicLeòid bho Chomann nam Pàrant Phort Rìgh.

"'S mar sin tha sinn airson 's gum bi goireasan gu leòr ann agus àite gu leòr ann dhan a h-uile duine.

"Chan eil e furasta seo a thomhas, air sàilleibh, chan eil agad ach mar gum biodh clann a tha aois 2, 's 1 's 0 far an urrainn dhut tòiseachdainn air dealbh a chruthachadh air cò mheud dhiubh a tha a' dol a thighinn tron t-siostam 's a tha ag iarraidh Gàidhlig.

"Ach tha sinn a' coimhead air dè am fiosrachadh as urrainn dhuinn a chruinneachadh aig an ìre seo airson dealbh a chruthachadh air a bheil an t-àrdachadh a tha seo a' dol a chumail a' dol, 's ma tha dè dh'fheumas sinn a dhèanamh airson planadh air adhart?"

Gheibhear an suirbhidh an seo.

Feumar a lìonadh ro Dhihaoine an 18mh den Ghiblean.