Fear far na Gàidhealtachd air bàsachadh an tubaist-rathaid

Dh'ainmich na poilis an duine a bhàsaich ann an tubaist rathaid faisg air Bucaidh tràth madainn Diluain.

B' e Alistair J Stiùbhairt, à Àrd nan Saor faisg air Inbhir Nis.

Chaidh fios a chur air na poilis mu 06:50m. Diluain gun robh tubaist air a bhith eadar Renault Megane gorm agus carbad-eiridinn air an A98 aig Arradoul faisg air Bucaidh ann an Siorrachd Bhanbh.

Bhàsaich Alistair J Stiùbhairt, a bha 36, aig làrach na tubaiste.

Chaidh dithis luchd-eiridinn agus aon euslainteach fireann a bha a' siubhal anns a' charbad-eiridinn a thoirt a dh'Ospadal an Dotair Grey ann an Eilginn, agus Ospadal Rìoghail Obar Dheathainn airson leigheis.

Chan eilear an dùil gu bheil duine aca air an droch ghoirteachadh.

Tha na poilis a' sireadh tuilleadh fiosrachaidh mu na thachair.

Tha iad cuideachd ag iarraidh air duine sam bith a bha a' dràibheadh san sgìre agus aig a bheil clàraidhean dashcam fios a chur thuca.