Fiosrachadh don phoball mun Rest and Be Thankful

Thèid fiosrachadh a thoirt don phoball air mar a tha a' dol do dh'oidhirpean air an A83 aig an Rest and Be Thankful ann an Earra-Ghàidheal a leasachadh.

Tha sreath de thachartasan gan cumail, a' tòiseaschadh ann an Ceann Loch Chille Chiarain, a sheallas do dhaoine mar a tha fuasgladh maireannach ga lorg do mar a tha an rathad dualtach a bhith air a dhùnadh an sin le maoimtean-slèibhe.

Am measg na tha ga dhèanamh, tha fasgadh ga chur os cionn an rathaid airson a dhìon bho sprùilleach nam maoimtean-slèibhe.

Tha cuideachd an raon-parcaidh aig àite-seallaidh an Rest ga leasachadh.

Gheibhear fiosrachadh cuideachd mu obair airson fuasgladh sa gheàrr-ùine fhaighinn le bhith a' cleachdadh seann rathad an Airm air ùlar a' ghlinne.

Tha na tachartasan an t-seachdain seo mar a leanas:

• Diluain an Talla Urras Leasachaidh Cheann a Deas Chinn Tìre an Ceann Loch Chille Chiarain eadar 10:00m is 4:00f

• Dimàirt an Eaglais Bhaisteach Cheann Loch Gilb eadar 12:00f is 7:00f

• Diciadain an Talla Baile Cheann Loch Goill eadar 10:00m is 4:00f

• Diardaoin an Talla nan Trì Bailtean san Archar eadar 10:00m is 4:00f.

"Tha Riaghaltas na h-Alba gu daingeann airson fuasgladh maireannach a lorg dhan trioblaid le maoimtean-slèibhe air an A83 aig an Rest and Be Thankful," thuirt Rùnaire na Còmhdhail, Fiona Hyslop.

"B' e dearbhadh air seo a bh' anns an fhiosrachadh a thugadh seachad an-uiridh gun deach an t-slighe a b' fheàrr leinn a thaghadh airson an rathad a leasachadh.

"Tha an obair-dealbhachaidh am-bliadhna a' gluasad aig astar, agus dùil gun tèid dreach-òrdughan fhoillseachadh ro dheireadh na bliadhna seo.

"Aig a' cheart àm tha sinn a' gluasad air adhart le ar planaichean gus an t-slighe eadar-amail air seann rathad an Airm a dhèanamh nas seasmhaiche.

"Tha dùil gum bi obair airson buaidh thuiltean a lùghdachadh aig ceann a deas an rathaid seo deiseil as t-Earrach," thuirt i.

Tha taisbeanadh bhiortual ann do dhaoine nach fhaigh chun nan tachartasan fiosrachaidh.