Dùil ri co-dhùnadh air cìs turasachd air a' Ghàidhealtachd san Dùbhlachd

Tha Comhairle na Gàidhealtachd ag ràdh gu bheil àireamhan luchd-turais air a bhith ag èirigh sna deich bliadhna a dh'fhalbh agus gun tàinig 8.4 millean ann an 2023

Tha dùil gun tèid molaidhean air cìs turasachd air a' Ghàidhealtachd air beulaibh chomhairlichean anns an Dùbhlachd.

Tha Comhairle na Gàidhealtachd air co-chomhairleachadh a chumail air cìs 5% a tha iad a' smaoineachadh a chruinnicheadh £10m gach bliadhna aig a' char as lugha.

Tha oifigich air a bhith a' coimhead air còrr air 4,000 freagairt a fhuair iad bho dhùin an co-chomhairleachadh sa Mhàrt.

Tha Seòmraichean Malairt a' Mhonaidh Ruaidh, Loch Abair agus Inbhir Nis air dragh a thogail agus iad ag ràdh gum faodadh a' chosgais a bharrachd luchd-turais a chur dheth o bhith a' tighinn don Ghàidhealtachd.

A rèir aithisg ro choinneimh den Chomhairle an ath-sheachdain, thèid molaidhean a chur fa chomhair nan comhairlichean airson beachdachadh orra anns an Dùbhlachd.

Chaidh cumhachdan a thoirt do dh'ùghdarrasan ionadail na h-Alba an-uiridh cìsean den leithid a chur an sàs.

Tha comhairlean Dhùn Èideann, Obair Dheathain is Glaschu air aontachadh cìs turasachd a thòiseachadh ach tha comhairlean eile air diùltadh an leithid a dhèanamh. Tha Arcaibh is Sealtainn nam measg.

Tha Comhairle nan Eilean Siar air na planaichean acasan a chur gu aona taobh an-dràsta.

Thuirt Comhairle na Gàidhealtachd gu bheil an àireamh de luchd-turais a tha a' tadhal air an sgìre air a bhith ag èirigh thairis air an 10 bliadhna mu dheireadh agus ann an 2023 bha an àireamh aig 8.4 millean.