Tha Urras Project a' dùnadh na h-oifis aca ann an Colla

Dh'innis an carthannas Urras Project gum bi iad a' reic nan togalaichean a th' aca ann an Colla mar phàirt de chrathadh air an dòigh obrach aca.

Tha a' bhuidheann air a bhith ag obair airson còrr is 50 bliadhna a' toirt chothroman do dhaoine òga obair shaor-thoileach eiticeil a dhèanamh thall thairis.

Tha iad ag ràdh gu bheil tòrr den obair aca fhathast ga dèanamh air-loidhne on bha Covid ann agus, mar sin, chan eil Ionad Innse Gall aca ann an Colla ga chleachdadh ach airson trì seachdainean sa bhliadhna.

Tha cosgaisean an ionaid a' sìor èirigh agus chan urrainn dhaibh mar bhuidheann chathrannais argamaid a dhèanamh airson a chumail fosgailte, tha iad ag ràdh.

Tha còrr agus 8,000 saor-thoileach òg air sgilean ùra ionnsachadh agus obair a dhèanamh thall thairis le taic an urrais bhon stèidhicheadh iad an 1967.

Tha iad ag ràdh gu bheil an àireamh dhaoine a tha a' sireadh chothroman leotha a' dol an-àirde agus gum feum iad maoineachadh airson dèanamh cinnteach gum bi obair an urrais seasmhach.

Tha Urras Project ag ràdh gu bheil iad an dòchas dreuchdan a dhìon le bhith a' gluasad gu bhith ag obair gu tur air-loidhne, agus tha sin a' toirt a-steach luchd-obrach a tha a' fuireach ann an Colla fhèin.

Tha iad an dòchas, tha iad ag ràdh, gum faigh muinntir agus eaconomaidh Cholla buannachd às an togalach a bhios iad a' reic.