Coinneamhan poblach mu aiseagan beaga Innse Gall

Tha CMAL a' cumail sreath de sheiseanan aghaidh ri aghaidh air feadh nan Eilean Siar airson beachdan dhaoine a thrusadh air aiseagan Chaolas Bharraigh is Chaolas na Hearadh.

Chaidh sreath de choinneamhan poblach a chumail ron seo anns an Fhaoilleach 2025.

Am measg na bhios air a' chlàr, bidh fiosrachadh mu dhealbhadh nan soithichean ùra a thuilleadh air deitichean agus fios air cuin a thathar a' sùileachadh a thèid iad ann an seirbheis.

Tha dùil ri riochdachadh o CMAL, Caledonian Mac a' Bhriuthainn agus Còmhdhail Alba aig na coinneamhan eadar Diluain 22mh is Diardaoin 25mh den t-Sultain.

Tha cothrom gu bhith aig duine sam bith a thèid thuca na beachdan aca a chur an cèill agus ceistean sam bith a th' aca fhaighneachd.

Bidh na seiseanan a' dol mar a leanas:

• Diluain 22/09/25, Talla a' Bhàgh a Tuath, Barraigh, 18:30-20:30

• Dimàirt 23/09/25, Talla Coimhearsnachd Èirisgeigh, 15:30-18:30

• Diciadain 24/09/25, An Lanntair, Steòrnabhagh 13:00-14:00 (Do chompanaidhean bathair is luchd-gnothachais eile)

• Dciadain 24/09/25, Talla Coimhearsnachd an Tairbeart, 16:00-19:00

• Diardaoin 25/09/25, Talla Coimhearsnachd Loch na Madadh, 15:30-18:30

Mura h-urrainn do dhuine sam bith a bhith aig na seiseanan, faodar ceistean a chur air post-d gu: [e-mail]

Tha tuilleadh fiosrachaidh an seo mu na diofar ìrean den phròiseas airson nan soithichean ùra.